Академияда “Ёшлар – коррупцияга қарши ҳаракат етакчилари” ташаббуси доирасида амалий семинар ўтказилди

Ҳуқуқни муҳофаза қилиш академияси томонидан Олий Мажлис Қонунчилик палатаси ҳузуридаги Ёшлар парламенти билан ҳамкорликда “Ёшлар – коррупцияга қарши ҳаракат етакчилари” мавзусида Республика амалий семинари ташкил этилди.

Тадбир Академия, Ёшлар парламенти, Ёшлар ишлари агентлиги ва Коррупцияга қарши курашиш агентлиги масъуллари иштирокида аралаш тарзда ўтказилиб, унга “Коррупцияга йўл йўқ” тарғибот декадаси фаоллари ҳам жалб этилди. Умумий ҳисобда 400 нафарга яқин ёшлар семинар доирасида иштирок этди.

Анжуман давомида ёшларга коррупциянинг моҳияти ва унинг салбий оқибатлари, миллий ва халқаро қонунчилик асослари, давлат органларининг ваколатлари, ёшлар ташаббусларининг давлат дастурларига интеграция қилиниши ҳамда коррупцияга қарши курашишда ёшларнинг фаол иштирокини таъминлаш бўйича зарур назарий ва амалий маълумотлар берилди.

Мазкур йўналишдаги ишлар давомли ва тизимли амалга оширилиши мақсадида, жорий йилнинг 27–28 ноябрь кунлари Академияда ўтказиладиган “Замонавий чақириқлар шароитида қонун устуворлигини таъминлаш: муаммо ва ечимлар” мавзусидаги халқаро илмий-амалий конференция доирасида Ёшлар парламенти ва Академия ўртасида ўзаро ҳамкорлик меморандуми имзоланиши режалаштирилган.

Меморандум ёшларни коррупцияга қарши курашиш ва унинг олдини олиш жараёнларига кенг жалб этиш, уларни ҳалоллик ва қонунга ҳурмат руҳида тарбиялаш, коррупцияга тоқатсизлик маданиятини шакллантиришга қаратилган қонунчиликни такомиллаштириш, тизимли таҳлил ва тадқиқотларни амалга ошириш ҳамда улар асосида амалий таклифлар ишлаб чиқиш бўйича Ҳуқуқни муҳофаза қилиш академияси ҳамда Ёшлар парламенти салоҳиятини бирлаштиришни назарда тутади.

Тадбир Ҳуқуқни муҳофаза қилиш академияси ташкил этилганининг уч йиллигига бағишланган академик декада доирасида ўтказилди.

Декада дастуридан қонун устуворлигини мустаҳкамлаш, ҳуқуқни муҳофаза қилувчи органлар ходимларининг касбий компетенцияларини ривожлантириш, замонавий таҳдидларга қарши курашиш ва халқаро ҳамкорликни кенгайтиришга қаратилган халқаро, илмий-амалий ва ўқув тадбирлари ўрин олган.