Akademiyada “Yoshlar – korrupsiyaga qarshi harakat yetakchilari” tashabbusi doirasida amaliy seminar o‘tkazildi

Huquqni muhofaza qilish akademiyasi tomonidan Oliy Majlis Qonunchilik palatasi huzuridagi Yoshlar parlamenti bilan hamkorlikda “Yoshlar – korrupsiyaga qarshi harakat yetakchilari” mavzusida Respublika amaliy seminari tashkil etildi.

Tadbir Akademiya, Yoshlar parlamenti, Yoshlar ishlari agentligi va Korrupsiyaga qarshi kurashish agentligi mas’ullari ishtirokida aralash tarzda o‘tkazilib, unga “Korrupsiyaga yo‘l yo‘q” targ‘ibot dekadasi faollari ham jalb etildi. Umumiy hisobda 400 nafarga yaqin yoshlar seminar doirasida ishtirok etdi.

Anjuman davomida yoshlarga korrupsiyaning mohiyati va uning salbiy oqibatlari, milliy va xalqaro qonunchilik asoslari, davlat organlarining vakolatlari, yoshlar tashabbuslarining davlat dasturlariga integratsiya qilinishi hamda korrupsiyaga qarshi kurashishda yoshlarning faol ishtirokini ta’minlash bo‘yicha zarur nazariy va amaliy ma’lumotlar berildi.

Mazkur yo‘nalishdagi ishlar davomli va tizimli amalga oshirilishi maqsadida, joriy yilning 27–28-noyabr kunlari Akademiyada o‘tkaziladigan “Zamonaviy chaqiriqlar sharoitida qonun ustuvorligini ta’minlash: muammo va yechimlar” mavzusidagi xalqaro ilmiy-amaliy konferensiya doirasida Yoshlar parlamenti va Akademiya o‘rtasida o‘zaro hamkorlik memorandumi imzolanishi rejalashtirilgan.

Memorandum yoshlarni korrupsiyaga qarshi kurashish va uning oldini olish jarayonlariga keng jalb etish, ularni halollik va qonunga hurmat ruhida tarbiyalash, korrupsiyaga toqatsizlik madaniyatini shakllantirishga qaratilgan qonunchilikni takomillashtirish, tizimli tahlil va tadqiqotlarni amalga oshirish hamda ular asosida amaliy takliflar ishlab chiqish bo‘yicha Huquqni muhofaza qilish akademiyasi hamda Yoshlar parlamenti salohiyatini birlashtirishni nazarda tutadi.

Tadbir Huquqni muhofaza qilish akademiyasi tashkil etilganining uch yilligiga bag‘ishlangan akademik dekada doirasida o‘tkazildi.

Dekada dasturidan qonun ustuvorligini mustahkamlash, huquqni muhofaza qiluvchi organlar xodimlarining kasbiy kompetensiyalarini rivojlantirish, zamonaviy tahdidlarga qarshi kurashish va xalqaro hamkorlikni kengaytirishga qaratilgan xalqaro, ilmiy-amaliy va o‘quv tadbirlari o‘rin olgan.