Жиноий даромадларни легаллаштиришга қарши курашишнинг янги ёндашувлари: Академияда халқаро конференциянинг параллел сессияси бўлиб ўтди

Ўзбекистон Республикаси Ҳуқуқни муҳофаза қилиш академияси ташкил этилганининг 3 йиллигига бағишлаб, “Замонавий чақириқлар шароитида қонун устуворлигини таъминлаш: муаммо ва ечимлар” мавзусидаги халқаро илмий-амалий конференция ўз ишини бошлади. 

Конференция ялпи мажлис ва ҳуқуқни муҳофаза қилиш соҳасининг долзарб масалаларига бағишланган параллел сессиялар форматида ташкил этилди.

Тадбирда 30 дан ортиқ давлатдан 120 нафар етакчи экспертлар, жумладан БМТ, ОБСЕ, Европа Иттифоқи, Халқаро миграция ташкилоти, ЮНЕСКО, Халқаро прокурорлар ассоциацияси ва бошқа тузилмалар вакиллари иштирок этмоқда.

Конференция иши “Жиноий фаолиятдан олинган даромадларни легаллаштириш ва терроризмни молиялаштиришга қарши курашиш: рақамли даврда ёндашувлар трансформацияси” мавзусидаги параллел сессия билан бошланди.

Гибрид (онлайн ва оффлайн) форматда ташкил этилган сессияда маҳаллий мутахассислар билан бир қаторда АҚШ, Буюк Британия, Туркия, Германия каби давлатлар ҳамда нуфузли халқаро ташкилотлардан экспертлар иштирок этдилар.

Сессияда БМТнинг Гиёҳвандлик ва жиноятчилик бўйича бошқармаси (UNODC) минтақавий маслаҳатчиси Александр Водяной жиноий даромадларни легаллаштиришга қарши курашишда сунъий интеллектдан фойдаланиш имкониятлари юзасидан маъруза қилди. Шунингдек, Туркиянинг MASAK модели мисолида молиявий жиноятларга қарши курашишда рақамли трансформация жараёнлари таҳлил этилди.

"Binance" компанияси вакили Николай Фалько ҳуқуқни муҳофаза қилувчи органлар билан крипто-активларини аниқлаш ва қайтаришдаги ҳамкорлик механизмларини ёритиб берди. Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти вакили Борийхон Маликов департамент фаолиятига “Хавфларни баҳолаш маркази”ни жорий этишга доир тақдимот билан чиқди.

“Эгмонт” гуруҳининг ўқув маркази (ECOFEL) вакили Майкл Бул ҳамда АҚШ Адлия департаменти (ICITAP) вакили Стивен Леттик соҳа учун мутахассислар тайёрлаш ва халқаро ҳамкорликни ривожлантиришнинг долзарб аҳамиятини алоҳида таъкидладилар.

Тадбир давомида бенефициар мулкдорлар реестридан фойдаланиш, чегара назоратида биометрик технологиялар (API/PNR)ни жорий этиш ҳамда активларни қайтариш бўйича FATFнинг янгиланган тавсиялари атрофлича муҳокама қилинди.

Сессия якунида иштирокчилар томонидан соҳа ривожига қаратилган аниқ таклиф ва хулосалар ишлаб чиқилди.