Кибермакон ва қонун устуворлиги: экспертлар замонавий таҳдидларни муҳокама қилдилар

Академияда «Замонавий таҳдидлар шароитида қонун устуворлигини таъминлаш: муаммолар ва ечимлар» мавзусидаги халқаро илмий-амалий конференциянинг иши «Кибермаконда ҳуқуқни муҳофаза қилиш фаолияти: таҳдидлар ва ечимлар» мавзусидаги параллел сессия доирасида давом эттирилди.

Сессия рақамли трансформация жараёнлари ва уларнинг қонунийлик ҳамда хавфсизликни таъминлашга таъсири бўйича фикр алмашиш учун миллий ва хорижий мутахассисларни бир майдонда бирлаштирган муҳим мулоқот платформасига айланди.

Сессия ишида Ирландия, Корея Республикаси, Сингапур, Испания, Эстония, Қирғиз Республикаси, Тожикистон Республикаси ва Қозоғистон Республикасидан кибержиноятчилик ва рақамли криминалистика соҳасидаги етакчи халқаро ва хорижий экспертлар, шунингдек ЕХҲТ мутахассислари иштирок этдилар. Шунингдек, Ўзбекистон Республикаси Президенти ҳузуридаги Миллий хавфсизлик кенгаши, Қонунчилик ва ҳуқуқий сиёсат институти, Бош прокуратура, Марказий банк ва бошқа идоралар экспертлари ўз маърузалари билан чиқиш қилдилар.

Тадбир доирасида рақамли трансформация шароитида қонун устуворлигини таъминлаш, жиноят ишларини тергов қилишда ОСИНТ методларини қўллаш, ижтимоий тармоқларда террористик фаолиятга қарши курашиш, жиноят жойини рақамли технологиялар ёрдамида кўздан кечиришнинг ўзига хос жиҳатлари, замонавий рақамли маконда киберхавфлар ўсиши, ҳуқуқни муҳофаза қилиш амалиётида нейрон тармоқлардан фойдаланиш, электрон далиллар билан ишлаш ҳамда киберхавфсизлик соҳасида кадрлар тайёрлаш каби долзарб масалалар муҳокама қилинди.

Муҳокамаларда Тошкент давлат юридик университети, Жамоат хавфсизлиги университети, ИИВ, ДХХ ва бошқа идоралар вакиллари, Академия профессор-ўқитувчилари, тингловчилари ва талабалари ҳам иштирок этдилар.

Сессия якунига кўра кенг қамровли фикр алмашув ва илғор тажриба асосида амалга оширилган мулоқот натижасида соҳанинг асосий муаммолари ва ривожланиш тенденциялари аниқланди. Кибержиноятчиликка қарши кураш самарадорлигини ошириш, шунингдек жадал ривожланаётган рақамли технологиялар шароитида қонун устуворлигини таъминлашга қаратилган амалий таклиф ва тавсиялар ишлаб чиқилди.