Глобал мобиллик, рақамли муҳит ва инсон ҳуқуқлари: Академияда экспертлар муҳокамаси

Академияда халқаро илмий-амалий конференциянинг иши “Чегара билмас инсон ҳуқуқлари: ноқонуний миграция, одам савдоси ва рақамли воқелик” мавзусидаги сессия доирасида дақвом этди. Тадбир глобаллашув ва рақамлашув шароитида инсон ҳуқуқларини ҳимоя қилиш, миграция жараёнлари ва одам савдосига қарши курашиш йўналишларида миллий ҳамда халқаро мутахассисларни бирлаштирди. Сессия Инсон ҳуқуқлари бўйича Миллий марказ директори, профессор, академик ва БМТ Инсон ҳуқуқлари қўмитаси аъзоси Акмал Саидов томонидан олиб борилди.

Анжуман очилишида миллий инсон ҳуқуқлари институтларининг миграция соҳасидаги роли, меҳнат мигрантларининг ҳуқуқий ҳимояси ва халқаро ҳамкорликнинг янги йўналишлари муҳокама қилинди. Африка қитъаси тажрибаси асосида миллий институтларнинг аҳамияти Амина Буайяш томонидан ёритилди. Миграция агентлиги вакиллари меҳнат миграциясида кузатилаётган янги тенденциялар, миграция оқимларини бошқариш ва хавфсиз миграция платформаларини шакллантириш масалалари юзасидан маълумот берди.

Миграция бўйича халқаро ташкилот миссияси раҳбари Эндрю Грей инсон ҳуқуқларини ҳимоя қилиш, болалар ҳуқуқларининг миграция жараёнларидаги ўрни ва одам савдосининг гендер ҳамда ёшга оид жиҳатлари бўйича таҳлилларни тақдим этди. Шунингдек, жиноятчиликка қарши кураш тизимида инсон ҳуқуқларини таъминлаш, мажбурий кўчириш, ногиронлиги бўлган аёллар дуч келадиган қийинчиликлар, қонуний ва хавфсиз меҳнат йўлларини кенгайтириш масалалари марокашлик олим Хадича Элмадмад томонидан атрофлича ёритилди.

Анжуманнинг навбатдаги қисмларида минтақавий соғлиқни сақлаш тизимидаги муаммолар, ВИЧ ва силга оид тиббий хизматларга тенг фойдаланиш, миграция муносабатларини рақамлаштириш ва ҳуқуқий тартибга солиш, глобал миқёсдаги инсон ҳуқуқлари таҳдидлари, трансмиллий мигрантлар ҳаёти ҳамда Европа йўналишларидаги меҳнат миграцияси тенденциялари бўйича илмий муҳокамалар ўтказилди.

Тадбирнинг якуний қисмида ноқонуний миграция ва инсон хавфсизлиги, секюритизация назарияси, киберхавфсизлик муҳитида инсон ҳуқуқларини таъминлаш, ҳамда одам савдосига қарши курашишнинг МДҲ давлатлари қонунчилигидаги ўзига хос хусусиятлари муҳокама қилинди. Шунингдек, ҳуқуқни муҳофаза қилиш органлари ўртасидаги ҳамкорлик механизмлари ва одам савдосидан жабрланганларни ҳимоя қилишда институционал ёндашув масалалари таҳлил этилди.

Анжуманда иштирок этган миллий ва халқаро экспертлар миграция ва инсон ҳуқуқлари масалаларида комплекс ёндашувни шакллантириш, минтақавий ҳамкорликни кучайтириш ва рақамли давр талабларига мос ҳуқуқий механизмларни яратиш бўйича амалий таклифлар ишлаб чиқдилар. Тадбир глобаллaшув шароитида инсон ҳуқуқларини таъминлашга доир илмий мулоҳазалар ва амалий тавсиялар муҳитида ўтди ҳамда Ўзбекистоннинг бу соҳадаги халқаро ҳамкорлигини мустаҳкамлашга хизмат қилди.