Global mobillik, raqamli muhit va inson huquqlari: Akademiyada ekspertlar muhokamasi

Akademiyada xalqaro ilmiy-amaliy konferensiyaning ishi “Chegara bilmas inson huquqlari: noqonuniy migratsiya, odam savdosi va raqamli voqelik” mavzusidagi sessiya doirasida daqvom etdi. Tadbir globallashuv va raqamlashuv sharoitida inson huquqlarini himoya qilish, migratsiya jarayonlari va odam savdosiga qarshi kurashish yo‘nalishlarida milliy hamda xalqaro mutaxassislarni birlashtirdi. Sessiya Inson huquqlari bo‘yicha Milliy markaz direktori, professor, akademik va BMT Inson huquqlari qo‘mitasi a’zosi Akmal Saidov tomonidan olib borildi.

Anjuman ochilishida milliy inson huquqlari institutlarining migratsiya sohasidagi roli, mehnat migrantlarining huquqiy himoyasi va xalqaro hamkorlikning yangi yo‘nalishlari muhokama qilindi. Afrika qit’asi tajribasi asosida milliy institutlarning ahamiyati Amina Buayyash tomonidan yoritildi. Migratsiya agentligi vakillari mehnat migratsiyasida kuzatilayotgan yangi tendensiyalar, migratsiya oqimlarini boshqarish va xavfsiz migratsiya platformalarini shakllantirish masalalari yuzasidan ma’lumot berdi.

Migratsiya bo‘yicha xalqaro tashkilot missiyasi rahbari Endryu Grey inson huquqlarini himoya qilish, bolalar huquqlarining migratsiya jarayonlaridagi o‘rni va odam savdosining gender hamda yoshga oid jihatlari bo‘yicha tahlillarni taqdim etdi. Shuningdek, jinoyatchilikka qarshi kurash tizimida inson huquqlarini ta’minlash, majburiy ko‘chirish, nogironligi bo‘lgan ayollar duch keladigan qiyinchiliklar, qonuniy va xavfsiz mehnat yo‘llarini kengaytirish masalalari marokashlik olim Xadicha Elmadmad tomonidan atroflicha yoritildi.

Anjumanning navbatdagi qismlarida mintaqaviy sog‘liqni saqlash tizimidagi muammolar, VICH va silga oid tibbiy xizmatlarga teng foydalanish, migratsiya munosabatlarini raqamlashtirish va huquqiy tartibga solish, global miqyosdagi inson huquqlari tahdidlari, transmilliy migrantlar hayoti hamda Yevropa yo‘nalishlaridagi mehnat migratsiyasi tendensiyalari bo‘yicha ilmiy muhokamalar o‘tkazildi.

Tadbirning yakuniy qismida noqonuniy migratsiya va inson xavfsizligi, sekyuritizatsiya nazariyasi, kiberxavfsizlik muhitida inson huquqlarini ta’minlash, hamda odam savdosiga qarshi kurashishning MDH davlatlari qonunchiligidagi o‘ziga xos xususiyatlari muhokama qilindi. Shuningdek, huquqni muhofaza qilish organlari o‘rtasidagi hamkorlik mexanizmlari va odam savdosidan jabrlanganlarni himoya qilishda institutsional yondashuv masalalari tahlil etildi.

Anjumanda ishtirok etgan milliy va xalqaro ekspertlar migratsiya va inson huquqlari masalalarida kompleks yondashuvni shakllantirish, mintaqaviy hamkorlikni kuchaytirish va raqamli davr talablariga mos huquqiy mexanizmlarni yaratish bo‘yicha amaliy takliflar ishlab chiqdilar. Tadbir globallashuv sharoitida inson huquqlarini ta’minlashga doir ilmiy mulohazalar va amaliy tavsiyalar muhitida o‘tdi hamda O‘zbekistonning bu sohadagi xalqaro hamkorligini mustahkamlashga xizmat qildi.