Сунъий интеллект ва қонун: хавфлар, имкониятлар ва тартибга солиш бўйича халқаро мулоқот

Халқаро илмий-амалий конференция доирасида “Сунъий интеллектни ҳуқуқий тартибга солиш: халқаро тажриба ва миллий истиқболлар” мавзусида параллел сессия бўлиб ўтди. Тадбир Ўзбекистон, Туркия, Тожикистон, Қирғизистон ва қатор бошқа давлатлардан етакчи ҳуқуқшунослар, ахборот технологиялари мутахассислари ҳамда давлат органлари вакилларини бирлаштирди.

Сессия давомида иштирокчилар сунъий интеллектни ривожлантириш ва уни хавфсиз қўллаш учун замонавий ҳуқуқий асосларни шакллантиришга оид кенг қамровли масалаларни муҳокама қилдилар. Хусусан, рақамли технологияларни тартибга солиш бўйича халқаро ёндашувлар, жумладан Европа ва Осиё моделлари таҳлил этилди, шунингдек миллий қонунчиликни глобал тенденцияларга мослаштириш масалаларига алоҳида эътибор қаратилди.

Муҳокамаларнинг яна бир муҳим йўналиши – сунъий интеллектни ҳуқуқни қўллаш амалиётида қўллаш билан боғлиқ хавфлар ва имкониятлар бўлди. Тақдимотларда маъмурий жараёнларни автоматлаштиришдан тортиб, ҳуқуқбузарликларни тергов қилиш, таҳдидларни прогноз қилиш ва жамоат хавфсизлигини таъминлашда интеллектуал тизимлардан фойдаланиш имкониятлари муҳокама этилди. Спикерлар инновациялар ва инсон ҳуқуқларини ҳимоя қилиш ўртасидаги мувозанатни таъминлайдиган ишончли ҳуқуқий механизмларни яратиш зарурлигини таъкидладилар.

Иштирокчилар, шунингдек, сунъий интеллектни жорий этишнинг этик жиҳатларини, алгоритмлар шаффофлиги, персонал маълумотларни ҳимоя қилиш, камситишга йўл қўймаслик ва суиистеъмолларни олдини олиш масалаларини кўриб чиқдилар. Сунъий интеллект тизимларини ишлаб чиқувчилар, провайдерлар ва операторларнинг масъулияти, шунингдек янги технологияларни тартибга солиш бўйича ягона норматив база яратишда давлатнинг роли ҳақида фикр алмашилди. Таъкидланишича, сунъий интеллектни тартибга солишда мувофиқлаштирилган ёндашувларни шакллантириш тез суръатлар билан ривожланаётган технологиялар шароитида қонун устуворлигини таъминлашнинг муҳим шартидир.

Конференция иши давом этмоқда. Унинг якуни бўйича сунъий интеллект соҳасида ҳуқуқий инфратузилмани ривожлантириш, рақамли тизимлар хавфсизлигини ошириш ва фуқаролар ҳуқуқларини ҳимоя қилишга қаратилган тавсиялар ишлаб чиқилади.