Sun’iy intellekt va qonun: xavflar, imkoniyatlar va tartibga solish bo‘yicha xalqaro muloqot

Xalqaro ilmiy-amaliy konferensiya doirasida “Sun’iy intellektni huquqiy tartibga solish: xalqaro tajriba va milliy istiqbollar” mavzusida parallel sessiya bo‘lib o‘tdi. Tadbir O‘zbekiston, Turkiya, Tojikiston, Qirg‘iziston va qator boshqa davlatlardan yetakchi huquqshunoslar, axborot texnologiyalari mutaxassislari hamda davlat organlari vakillarini birlashtirdi.

Sessiya davomida ishtirokchilar sun’iy intellektni rivojlantirish va uni xavfsiz qo‘llash uchun zamonaviy huquqiy asoslarni shakllantirishga oid keng qamrovli masalalarni muhokama qildilar. Xususan, raqamli texnologiyalarni tartibga solish bo‘yicha xalqaro yondashuvlar, jumladan Yevropa va Osiyo modellari tahlil etildi, shuningdek milliy qonunchilikni global tendensiyalarga moslashtirish masalalariga alohida e’tibor qaratildi.

Muhokamalarning yana bir muhim yo‘nalishi – sun’iy intellektni huquqni qo‘llash amaliyotida qo‘llash bilan bog‘liq xavflar va imkoniyatlar bo‘ldi. Taqdimotlarda ma’muriy jarayonlarni avtomatlashtirishdan tortib, huquqbuzarliklarni tergov qilish, tahdidlarni prognoz qilish va jamoat xavfsizligini ta’minlashda intellektual tizimlardan foydalanish imkoniyatlari muhokama etildi. Spikerlar innovatsiyalar va inson huquqlarini himoya qilish o‘rtasidagi muvozanatni ta’minlaydigan ishonchli huquqiy mexanizmlarni yaratish zarurligini ta’kidladilar.

Ishtirokchilar, shuningdek, sun’iy intellektni joriy etishning etik jihatlarini, algoritmlar shaffofligi, personal ma’lumotlarni himoya qilish, kamsitishga yo‘l qo‘ymaslik va suiiste’mollarni oldini olish masalalarini ko‘rib chiqdilar. Sun’iy intellekt tizimlarini ishlab chiquvchilar, provayderlar va operatorlarning mas’uliyati, shuningdek yangi texnologiyalarni tartibga solish bo‘yicha yagona normativ baza yaratishda davlatning roli haqida fikr almashildi. Ta’kidlanishicha, sun’iy intellektni tartibga solishda muvofiqlashtirilgan yondashuvlarni shakllantirish tez sur’atlar bilan rivojlanayotgan texnologiyalar sharoitida qonun ustuvorligini ta’minlashning muhim shartidir.

Konferensiya ishi davom etmoqda. Uning yakuni bo‘yicha sun’iy intellekt sohasida huquqiy infratuzilmani rivojlantirish, raqamli tizimlar xavfsizligini oshirish va fuqarolar huquqlarini himoya qilishga qaratilgan tavsiyalar ishlab chiqiladi.