Академия ёшларда гиёҳванд моддаларга қарши мустаҳкам иммунитет шакллантириш бўйича тизимли ишларни кучайтирмоқда

Ўзбекистон Республикаси Ҳуқуқни муҳофаза қилиш академияси ёшлар саломатлигини муҳофаза қилиш, уларнинг ҳуқуқий маданиятини ошириш ва гиёҳванд моддаларга ҳамда улар билан боғлиқ жиноятларга нисбатан муросасиз муносабатни шакллантиришга қаратилган кенг қамровли профилактик ишларини тизимли равишда амалга ошириб келмоқда. Шу йўналишда Академиянинг 1-курс талабалари иштирокида гиёҳванд моддалар истеъмоли ва унга оид хатарларнинг олдини олишга бағишланган мавзули давра суҳбати ўтказилди. 

Тадбирда ёшлар билан ишлаш, маънавият ва маърифат бўлими ва Шахсий хавфсизлик бўлими раҳбарияти, Академияга бириктирилган профилактика инспектори, шунингдек Юнусобод тумани ИИБнинг вояга етмаганлар ва ёшлар ўртасидаги жиноятчиликка қарши курашиш гуруҳи катта инспектори Г.Ж.Заримова иштирок этдилар.

Давра суҳбати давомида гиёҳванд моддаларнинг салбий оқибатлари, ёшларни ноқонуний айланмага жалб этиш усуллари, замонавий профилактика механизмлари, шунингдек таълим масканларининг профилактикадаги ўрни ҳақида атрофлича маълумот берилди.

Талабаларнинг ҳуқуқий саводхонлигини ошириш, салбий таъсирларга қарши туриш кўникмаларини ривожлантириш, шахсий ва жамоавий хавфсизлик учун масъулият ҳиссини мустаҳкамлаш масалаларига алоҳида эътибор қаратилди.

Ушбу тадбир Академияда хавфсиз ва соғлом таълим муҳитини шакллантириш, ёшлар онгига соғлом ҳаёт тарзи ва маънавий мустақиллик ғояларини сингдиришга қаратилган доимий профилактик ишлар тизимининг навбатдаги бўғини бўлди. Академия келгусида ҳам соҳа мутахассислари ва амалий ходимларни жалб этган ҳолда бундай учрашув, маъруза ва тренингларни мунтазам ўтказиб боришни режалаштирган.