Ҳуқуқни муҳофаза қилиш академияси ва “Group-IB Global Private Limited” компанияси ўртасида ҳамкорлик меморандуми имзоланди

Ўзбекистон Республикаси Ҳуқуқни муҳофаза қилиш академияси ташкил этилганининг 3 йиллигига бағишланган халқаро илмий-амалий конференция доирасида киберхавфсизлик соҳасида жаҳоннинг етакчи ташкилотларидан бири ҳисобланган “Group-IB Global Private Limited” компанияси вакиллари билан учрашув бўлиб ўтди. Учрашув доирасида томонлар ўртасида ўзаро ҳамкорлик меморандуми имзоланди.

Мазкур меморандумнинг асосий мақсади – томонлар ўртасида рақамли криминалистика соҳасида самарали ҳамкорликни ривожлантириш, ахборот-коммуникация технологияларидан фойдаланган ҳолда содир этилган жиноятларни тергов қилиш услубларини такомиллаштириш ҳамда илмий-техник салоҳиятни мустаҳкамлашдан иборат.

Ҳужжат доирасида томонлар ахборот технологиялари ёрдамида содир этилган жиноятларни фош этишда замонавий ечимларни қўллаш, рақамли далиллар билан ишлаш жараёнларини оптималлаштириш, шунингдек, киберхавфсизлик бўйича қўшма илмий-тадқиқот лойиҳаларини амалга оширишга келишиб олдилар. Шунингдек, Академия тингловчилари ва профессор-ўқитувчилари учун Group-IB мутахассислари иштирокида мастер-класс ва тренинглар ташкил этиш режалаштирилди.

Тадбир давомида таъкидланганидек, мазкур ҳамкорлик Ўзбекистонда кибержиноятчиликка қарши курашиш тизимини янада такомиллаштириш, тергов амалиётига илғор халқаро тажриба ва инновацион технологияларни жорий этишда муҳим қадам бўлиб хизмат қилади.