Коррупцияга қарши курашда янги авлод: минтақа талабалари БМТ Конвенцияси моделида иштирок этди

Ҳуқуқни муҳофаза қилиш академияси ташкил топганлигининг уч йиллиги муносабати билан ташкил этилган академик якунида ҳамда Халқаро коррупцияга қарши курашиш ойлиги доирасида Академияда “БМТнинг Коррупцияга қарши конвенцияси иштирокчи-давлатлари конференцияси модели: иккинчи босқични амалга ошириш обзори” ташкил этилди.

2019 йилдан бошлаб Академия томонидан ҳар йили анъанавий тарзда ўтказиладиган мазкур тадбир Коррупцияга қарши курашиш агентлиги ҳамкорлигида Германия халқаро ҳамкорлик жамияти (GIZ), БМТнинг Гиёҳвандлик ва жиноятчилик бўйича бошқармаси (БМТ ГЖБ), БМТнинг Тараққиёт дастури ҳамда “Минтақавий мулоқот” ХННТ кўмагида ўтказилди.

Тадбирда республикамиз ва Марказий Осиё юридик олий таълим муассасалари бакалавриат талабалари ва магистратура тингловчиларидан иборат 11 та жамоа иштирок этди.

Конференция икки босқичдан иборат бўлиб, унда иштирокчилар БМТ конференцияси моделида Конвенция иштирокчи-давлатлари делегатлари сифатида ролли ўйинларда ўз билимларини намоён қилишди. 

Хусусан, биринчи босқичда иштирокчилар Нигерия, Австралия, Германия, Португалия, Швейцария, Словения, АҚШ, Буюк Британия, Ирландия, Жанубий Африка ва Шимолий Македония давлатларининг шартли делегатлари сифатида БМТ Конвенциясининг 55-моддаси, яъни мусодара қилиш мақсадларидаги халқаро ҳамкорлик қоидаларининг мазкур давлатлар қонунчилигида қўлланилиши бўйича ҳисобот беришди. 

Маълумот учун: Конвенциянинг 55-моддаси иштирокчи-давлатлар ўз ҳудудида жиноий даромадларни, мол-мулкни ва жиноят содир этиш воситаларини мусодара қилиш тўғрисидаги мурожаатномаларни ижро қилиш ва ижрога юбориш, бундай мулкларни аниқлаш, кузатиш, ҳибсга олиш ҳамда мусодара қилиш учун чоралар кўриш ҳамда мазкур модданинг ҳолатларини ҳалол бўлган учинчи томонларнинг ҳуқуқларига зарар етказадиган тарзда талқин қилмаслик каби қоидаларни белгилайди.

Тадбирнинг иккинчи қисмида таълим муассасалари жамоалари ўзлари ҳимоя қилган хорижий давлатнинг тажрибаси асосида ўз мамлакатларида мусодара қилиш мақсадларидаги халқаро ҳамкорлик қоидаларини таъминлашга қаратилган таклифлар орқали миллий қонунчиликни такомиллаштириш бўйича чиқишларни амалга оширишди. 

Шартли делегатларнинг ҳисоботлари ва таклифлари Бош прокуратура, БМТ ГЖБ ва GIZнинг соҳага доир эксперт-мутахассислари томонидан баҳолаб борилди. 

Мазкур тадбир олий таълим муассасаларининг талабалари ва тингловчиларига БМТнинг Коррупцияга қарши конвенцияси ва илғор хорижий давлатларда мусодара қилиш масалаларида халқаро ҳамкорликни ривожлантириш масалаларини чуқур ўрганишга ва бу борадаги билим ва кўникмаларини оширишга ёрдам берди.

Тадбир якунида барча иштирокчилар сертификатлар ҳамда совғалар билан тақдирландилар.