Ёшлар ва ҳалоллик маданияти: Акмал Бурхонов Академия талабалари билан учрашди

Ўзбекистон Республикаси Ҳуқуқни муҳофаза қилиш академиясида Халқаро коррупцияга қарши кураш кунига бағишлаб ташкил этилган тадбирлар доирасида Академия талабалари учун Ўзбекистон Республикаси Коррупцияга қарши курашиш агентлиги директори А.Бурхонов билан учрашув ўтказилди.

Учрашувнинг мақсади коррупцияга қарши сиёсатнинг долзарб масалалари юзасидан фикр алмашиш, ёшларнинг поклик ва ҳалоллик маданиятини шакллантиришдаги ролини муҳокама қилиш, шунингдек, давлат томонидан коррупциянинг олдини олиш ва унинг олдини олиш борасида қўлланилаётган замонавий ёндашувлар билан талабаларни таништиришдан иборат бўлди.

Тадбирда Акмал Бурхонов мамлакатимизда коррупцияга қарши курашиш соҳасида амалга оширилаётган давлат сиёсатига оид асосий йўналишлар ҳақида батафсил тўхталиб ўтди. У ўз чиқишида давлат органлари фаолиятида очиқлик, ошкоралик ва ҳисобдорликни оширишга қаратилган тизимли ислоҳотларнинг аҳамиятини алоҳида қайд этди. Шу билан бирга, ёшлар ўртасида коррупцияга қарши иммунитетни мустаҳкамлаш мамлакат барқарор тараққиёти ва давлат бошқаруви институтларининг самарали фаолияти учун муҳим аҳамият касб этишини таъкидлади.

Академия талабалари учрашув давомида фаол иштирок этиб, коррупцияга қарши курашиш соҳасидаги халқаро стандартлар, жамоатчилик назорати механизмлари, коррупциявий хатарларни камайтиришда рақамлаштиришнинг ўрни, шунингдек, қонунийлик ва ҳуқуқ-тартиботни таъминлашга масъул тузилмалардаги касбий ривожланиш имкониятлари борасида саволлар йўлладилар.

Учрашув мазмунан бой ва конструктив руҳда ўтди ҳамда бўлажак ҳуқуқшунос ва ҳуқуқни муҳофаза қилиш соҳаси мутахассислари учун ҳалоллик, касб этикаси ва ҳуқуқий масъулият принципларини чуқур англашни шакллантирувчи муҳим мулоқот майдончасига айланди.