Yoshlar va halollik madaniyati: Akmal Burxonov Akademiya talabalari bilan uchrashdi

O‘zbekiston Respublikasi Huquqni muhofaza qilish akademiyasida Xalqaro korrupsiyaga qarshi kurash kuniga bag‘ishlab tashkil etilgan tadbirlar doirasida Akademiya talabalari uchun O‘zbekiston Respublikasi Korrupsiyaga qarshi kurashish agentligi direktori A.Burxonov bilan uchrashuv o‘tkazildi.

Uchrashuvning maqsadi korrupsiyaga qarshi siyosatning dolzarb masalalari yuzasidan fikr almashish, yoshlarning poklik va halollik madaniyatini shakllantirishdagi rolini muhokama qilish, shuningdek, davlat tomonidan korrupsiyaning oldini olish va uning oldini olish borasida qo‘llanilayotgan zamonaviy yondashuvlar bilan talabalarni tanishtirishdan iborat bo‘ldi.

Tadbirda Akmal Burxonov mamlakatimizda korrupsiyaga qarshi kurashish sohasida amalga oshirilayotgan davlat siyosatiga oid asosiy yo‘nalishlar haqida batafsil to‘xtalib o‘tdi. U o‘z chiqishida davlat organlari faoliyatida ochiqlik, oshkoralik va hisobdorlikni oshirishga qaratilgan tizimli islohotlarning ahamiyatini alohida qayd etdi. Shu bilan birga, yoshlar o‘rtasida korrupsiyaga qarshi immunitetni mustahkamlash mamlakat barqaror taraqqiyoti va davlat boshqaruvi institutlarining samarali faoliyati uchun muhim ahamiyat kasb etishini ta’kidladi.

Akademiya talabalari uchrashuv davomida faol ishtirok etib, korrupsiyaga qarshi kurashish sohasidagi xalqaro standartlar, jamoatchilik nazorati mexanizmlari, korrupsiyaviy xatarlarni kamaytirishda raqamlashtirishning o‘rni, shuningdek, qonuniylik va huquq-tartibotni ta’minlashga mas’ul tuzilmalardagi kasbiy rivojlanish imkoniyatlari borasida savollar yo‘lladilar.

Uchrashuv mazmunan boy va konstruktiv ruhda o‘tdi hamda bo‘lajak huquqshunos va huquqni muhofaza qilish sohasi mutaxassislari uchun halollik, kasb etikasi va huquqiy mas’uliyat prinsiplarini chuqur anglashni shakllantiruvchi muhim muloqot maydonchasiga aylandi.