Япониялик эксперт иштирокида Академияда йўл ҳаракати хавфсизлиги бўйича амалий машғулот ўтказилди

Ҳуқуқни муҳофаза қилиш Академиясида Япониянинг Халқаро ҳамкорлик агентлиги (JICA) билан ҳамкорликда амалга оширилаётган “Йўл ҳаракати хавфсизлиги” лойиҳаси доирасида амалий машғулот ташкил этилди. Ушбу лойиҳа 2023–2025 йилларда амалга оширилиши белгиланган бўлиб, унда Япониянинг етакчи мутахассислари иштирок этмоқда.

Лойиҳа доирасида 2023 йил сентябрь ойидан бошлаб Япониядан келган 6 нафар эксперт томонидан мамлакатимиздаги йўл-транспорт ҳодисаларининг келиб чиқиш сабаблари ўрганилмоқда. Шунингдек, 2024 йилда Япониянинг ALMEC компанияси томонидан Тошкент шаҳрининг Юнусобод тумани ҳамда Тошкент вилояти Янгийўл шаҳрида йўл-транспорт ҳодисаларининг олдини олишга қаратилган пилот лойиҳа амалга оширилди. Пилот лойиҳа давомида авария ҳолатларида фуқароларнинг ҳаракатлари таҳлил қилиниб, аниқланган хавфли ҳудудларда Япония маблағлари ҳисобидан реконструкция ишлари амалга оширилди.

Академияда ўтказилган навбатдаги машғулот JICA эксперти Нишида Ясуши иштирокида ташкил этилди. У йўл-транспорт ҳодисаларини ўрганиш, маълумотларни таҳлил қилиш ва хавф омилларини аниқлаш бўйича улкан тажрибага эга халқаро даражадаги мутахассис ҳисобланади. Нишида Ясуши ўз фаолияти давомида йўл ҳаракати хавфсизлиги соҳасидаги қатор йирик тадқиқотларда иштирок этган, хорижий мамлакатларда амалга оширилган лойиҳаларда эксперт сифатида фаолият юритган ҳамда Япониянинг ITARDA — Йўл-транспорт ҳодисаларини ўрганиш ва таҳлил қилиш институтида масъулиятли лавозимларда ишлаган.

Машғулот давомида талабалар амалга оширилаётган лойиҳа мазмуни, Японияда қўлланиладиган илмий-амалий тадқиқот усуллари, маълумотларни йиғиш ва таҳлил қилиш стандартлари билан танишдилар. Шунингдек, япон маданияти ва миллий урф-одатлари ҳақида қизиқарли маълумотлар ҳам тақдим этилди.

Бундай учрашувлар талабаларнинг соҳавий кўникмаларини ривожлантириш, халқаро илғор тажриба билан танишиши ва йўл ҳаракати хавфсизлиги соҳасидаги билимларини янада бойитишга хизмат қилади. Академиянинг Лойиҳа бошқаруви бўлими келгусида ҳам халқаро экспертлар иштирокидаги амалий машғулот ва мастер-классларни изчил ташкил этишга алоҳида эътибор қаратмоқда.