Тергов сифатини ошириш: Академияда далилларни баҳолашда йўл қўйиладиган хатолар муҳокама қилинди

Ўзбекистон Республикаси Ҳуқуқни муҳофаза қилиш академиясида жиноят ишлари бўйича дастлабки тергов ва суд жараёнида далилларни баҳолашда учрайдиган хатоларни илмий ва амалий жиҳатдан муҳокама қилишга бағишланган давра суҳбати бўлиб ўтди.

Тадбирда Тошкент шаҳар ИИББ ҳузуридаги Тергов бошқармаси катта терговчиси Д.Ф.Ёкубов, «LEGACY and SHIELD» адвокатлик бюроси адвокати Р.Б.Базаров ҳамда Адлия вазирлиги ҳузуридаги Х.Сулаймонова номидаги Республика суд-экспертиза марказининг эксперти Б.Б.Ахмедов иштирок этди.

Муҳокама давомида мутахассислар тергов ҳаракатларини амалга оширишда холислар иштирокини қонуний тарзда таъминлаш, рақамли далилларни аниқлаш ва уларни белгиланган тартибда протоколлар орқали расмийлаштириш, терговчи ва ҳимоячи ўртасида самарали ҳамкорликни ташкил этиш, адвокатнинг процессуал камчиликларни кўрсатиб бериш орқали тергов сифатига таъсири каби масалаларга алоҳида тўхталдилар. Шунингдек, ДНК-экспертизанинг имкониятлари, намуна олиш жараёнида йўл қўйиладиган хатолар ҳамда эксперт хулосасининг тергов қарорларига таъсири ҳақида батафсил маълумот берилди.

Тадбир якунида мутахассислар талабаларнинг саволларига жавоб бериб, уларнинг келгусидаги тергов фаолиятида бундай хатоларга йўл қўймаслик бўйича амалий тавсияларини баён этдилар.