Қозоғистон Республикаси Бош прокуратураси ҳузуридаги Ҳуқуқни муҳофаза қилувчи органлар академияси билан ҳамкорликнинг янги босқичи

Академия ташкил этилганининг 3 йиллигига бағишланган халқаро илмий-амалий конференция доирасида Қозоғистон Республикаси Бош прокуратураси ҳузуридаги Ҳуқуқни муҳофаза қилувчи органлар академияси билан ҳамкорлик тўғрисидаги келишув имзоланди.

Ушбу ҳужжат икки томонлама муносабатларни янада ривожлантириш ва мустаҳкамлаш ҳамда янги босқичга олиб чиқиш йўлида муҳим қадам ҳисобланади. Ҳужжат томонлар ўртасида таълим ва илмий-тадқиқот соҳаларида ҳамкорликни ривожлантириш, кадрлар тайёрлашда ресурс ва салоҳиятни бирлаштириш, академик алмашинув, қўшма таълим тадбирлари, фундаментал ва амалий тадқиқотлар, ўзаро ахборот алмашиш имкониятларидан самарали фойдаланишга қаратилган.

Қозоғистон Республикаси Бош прокуратураси ҳузуридаги Ҳуқуқни муҳофаза қилувчи органлар академияси 2015 йилда ташкил этилган бўлиб, алоҳида мақомга эга таълим муассасаси ҳисобланади. Академия ҳуқуқни муҳофаза қилувчи органлар ходимларини тайёрлаш, қайта тайёрлаш ва малакасини ошириш, олий ўқув юртидан кейинги таълим дастурларини амалга оширади, идоралараро илмий тадқиқотларни мувофиқлаштиради ҳамда прокуратура ва иқтисодий тергов органларида хизмат қилиш учун номзодларнинг дастлабки касбий тайёргарлигини таъминлайди. Академия ривожланган илмий-таълим инфратузилмаси, илмий нашрларга эга бўлиб, хорижнинг етакчи илмий ва таълим муассасалари билан 40 га яқин ҳамкорлик келишувларини имзолаган.

Ўзаро мулоқотда томонлар ҳамкорликни ривожлантиришдан манфаатдор эканликларини таъкидлаб, келгуси ҳамкорликнинг устувор йўналишларини муҳокама қилдилар. Имзоланган ҳамкорлик келишуви ўзаро манфаатли муносабатларни янада мустаҳкамлаш ва уларни янги босқичга олиб чиқишга хизмат қилади.