Ҳуқуқий маданият ва ҳалоллик: Академия коррупцияга қарши маърифий фаолиятни кучайтирмоқда

Коррупцияга қарши курашиш халқаро куни муносабати билан Ўзбекистон Республикаси Ҳуқуқни муҳофаза қилиш академияси давлат органлари ва бошқа ташкилотларда коррупцияга қарши маданиятни шакллантириш, ҳуқуқий онг ва ҳуқуқий билимларни ошириш, шунингдек, ҳалоллик ва поклик тамойилларини мустаҳкамлашга қаратилган маърифий тадбирларни амалга оширмоқда.

Ушбу ташаббус доирасида Академия томонидан “Биз биргаликда коррупцияга қарши курашамиз” мавзусида «O‘ZLITINEFTGAZ» акциядорлик жамияти ходимлари учун амалий семинар ташкил этилди.

Тадбир давомида Академиянинг Коррупцияга қарши курашиш илмий-таълим маркази вакили иштирокчиларга БМТнинг Коррупцияга қарши конвенциясининг асосий қоидалари, миллий антикоррупция қонунчилиги, корпоратив интизом ва хизмат одоби масалалари, манфаатлар тўқнашувининг олдини олиш ва уни бартараф этиш чоралари тўғрисида атрофлича маълумот берди.

Шунингдек, иш жойида шаффофлик, очиқлик ва ҳисобдорликни таъминлаш бўйича илғор ёндашувлар ва самарали амалиётларга алоҳида эътибор қаратилди ҳамда коррупцияга нисбатан мутлақ муросасизлик тамойилларини кундалик хизмат фаолиятида қўллаш масалалари таъкидланди.

Амалий семинар ўтказилиши иштирокчиларнинг коррупцияга қарши курашиш соҳасидаги билим ва амалий кўникмаларини мустаҳкамлашга, шунингдек, ҳалоллик қадриятларини шакллантириш ва ривожлантиришга хизмат қилади.