Вилоятлар прокурорлари ўринбосарлари учун малака ошириш курслари

Жорий йилнинг 22 декабрь куни Бош прокуратура Академиясида  вилоятлар прокурорлари ҳамда уларга тенглаштирилган прокурорларнинг ўринбосарлари учун “Ҳуқуқбузарликлар профилактикаси ва жиноятчиликка қарши курашишнинг сифат жиҳатдан янги тизимини жорий этиш масалалари” мавзусидаги малака ошириш курслари ниҳоясига етди.

Мазкур курслар дастури прокуратура органларининг ҳуқуқбузарликлар профилактикаси ва жиноятчиликка қарши курашиш амалиёти ва уларнинг фаолиятида мавжуд бўлган тизимли муаммо ва камчиликларни таҳлил қилиш асосида шакллантирилди.

Ҳуқуқбузарликлар профилактикаси ва жиноятчиликка қарши курашиш фаолиятининг самарадорлигини оширишга йўналтирилган ушбу курслар давомида вазиятли тренинглар, гуруҳ тақдимотлари, кейс каби ўқитиш методларини ўз ичига олган интерфаол ўқитиш тадбирлари ташкил қилинди.

Ўтказилган ўқув курслари жараёнида ҳудудларда криминоген вазиятни барқарорлаштириш, прокуратура, ИИВ ва бошқа мутасадди идоралар ўртасидаги ўзаро ҳамкорликни янада ривожлантириш ҳамда жиноятчиликка қарши курашдаги фаолият самарадорлигини оширишга алоҳида тўхталиб ўтилди.

Бундан ташқари, курс тингловчилари Тошкент шаҳар туманларида ўтказилган сайёр ўқув машғулотларида “Хавфсиз шаҳар” аппарат-дастурий комплекси имкониятлари ҳамда Ўзбекистон Республикасида йўл ҳаракати хавфсизлигини таъминлаш концепциясини амалга ошириш доирасидаги ишлар билан танишиб чиқиб, ўзларининг фикр ва мулоҳазаларини мушоҳада қилдилар.

Тингловчиларга ҳуқуқбузарлик ва жиноятларнинг содир этилишидан аввал уларни олдини олиш юзасидан илғор миллий ва халқаро тажрибалар тақдим этилди.

Ўқув курси якунида тингловчиларга сертификатлар топширилди.