Академия GreenMetric 2025 халқаро рейтингида ўз мавқеини яхшилади

Ўзбекистон Республикаси Ҳуқуқни муҳофаза қилиш академияси UI GreenMetric World University Rankings 2025 халқаро рейтингида 675-ўринни эгаллади. Жорий йилда мазкур рейтингда 105 мамлакатдан 1 745 та университет иштирок этди, бу эса уни олий таълим соҳасида барқарор ривожланишни баҳолашга қаратилган энг йирик глобал платформалардан бири эканини тасдиқлайди.

UI GreenMetric рейтинги университетлар фаолиятини олти асосий йўналиш бўйича баҳолайди. Улар инфратузилманинг ҳолати ва энергия истеъмоли даражасидан тортиб, чиқиндиларни бошқариш, сув ресурсларидан фойдаланиш, транспорт тизимини ташкил этиш ҳамда барқарор ривожланиш соҳасидаги ўқув ташаббусларни амалга оширишгача бўлган масалаларни қамраб олади. Рейтингнинг асосий мақсади – олий таълим муассасалари томонидан жорий этилаётган экологик йўналтирилган ечимларни ҳамда уларнинг жамият ва атроф-муҳит олдидаги масъулият даражасини намоён этишдан иборат.

Академиянинг 675-ўринга кўтарилиши экологик сиёсатни такомиллаштириш, энергия ва сув ресурсларини тежаш механизмларини ривожлантириш, чиқиндиларни алоҳида йиғиш ва қайта ишлаш амалиётларини жорий этиш, шунингдек, барқарор ва экологик жиҳатдан йўналтирилган кампус муҳитини шакллантириш бўйича олиб борилаётган тизимли ишларнинг самарали натижасидир.

Ўзбекистон Республикаси Ҳуқуқни муҳофаза қилиш академияси барқарор ривожланиш соҳасидаги ташаббусларни изчил равишда амалга оширишни давом эттиради ҳамда халқаро рейтингларда ўз позицияларини янада мустаҳкамлашга интилади.