Akademiya GreenMetric 2025 xalqaro reytingida o‘z mavqeini yaxshiladi

O‘zbekiston Respublikasi Huquqni muhofaza qilish akademiyasi UI GreenMetric World University Rankings 2025 xalqaro reytingida 675-o‘rinni egalladi. Joriy yilda mazkur reytingda 105 mamlakatdan 1 745 ta universitet ishtirok etdi, bu esa uni oliy ta’lim sohasida barqaror rivojlanishni baholashga qaratilgan eng yirik global platformalardan biri ekanini tasdiqlaydi.

UI GreenMetric reytingi universitetlar faoliyatini olti asosiy yo‘nalish bo‘yicha baholaydi. Ular infratuzilmaning holati va energiya iste’moli darajasidan tortib, chiqindilarni boshqarish, suv resurslaridan foydalanish, transport tizimini tashkil etish hamda barqaror rivojlanish sohasidagi o‘quv tashabbuslarni amalga oshirishgacha bo‘lgan masalalarni qamrab oladi. Reytingning asosiy maqsadi – oliy ta’lim muassasalari tomonidan joriy etilayotgan ekologik yo‘naltirilgan yechimlarni hamda ularning jamiyat va atrof-muhit oldidagi mas’uliyat darajasini namoyon etishdan iborat.

Akademiyaning 675-o‘ringa ko‘tarilishi ekologik siyosatni takomillashtirish, energiya va suv resurslarini tejash mexanizmlarini rivojlantirish, chiqindilarni alohida yig‘ish va qayta ishlash amaliyotlarini joriy etish, shuningdek, barqaror va ekologik jihatdan yo‘naltirilgan kampus muhitini shakllantirish bo‘yicha olib borilayotgan tizimli ishlarning samarali natijasidir.

O‘zbekiston Respublikasi Huquqni muhofaza qilish akademiyasi barqaror rivojlanish sohasidagi tashabbuslarni izchil ravishda amalga oshirishni davom ettiradi hamda xalqaro reytinglarda o‘z pozitsiyalarini yanada mustahkamlashga intiladi.