Академик салоҳиятни бирлаштириш: ҳамкорлик тўғрисида меморандум имзоланди  

2025 йил 12 декабрь куни Ўзбекистон Республикаси Ҳуқуқни муҳофаза қилиш академиясида Ўзбекистон Республикаси Президенти ҳузуридаги Давлат сиёсати ва бошқаруви академияси делегациясининг танишув ташрифи бўлиб ўтди. Ташриф доирасида ишчи учрашув ўтказилиб, таълим ва илмий-тадқиқот фаолияти соҳасида ҳамкорлик меморандуми имзоланди.

Ташриф чоғида Давлат сиёсати ва бошқаруви академияси вакиллари Ҳуқуқни муҳофаза қилиш академиясининг фаолияти, таълим дастурлари, илмий-тадқиқот инфратузилмаси, шунингдек, ўқув жараёнини ташкил этишда қўлланилаётган замонавий технологиялар ва моддий-техник имкониятлар билан яқиндан танишдилар.

Тадбирнинг муҳим қисми сифатида ўзаро ҳамкорлик меморандумининг имзоланиши таълим соҳасида замонавий талабларга жавоб берадиган профессионал ва юқори малакали кадрларни тайёрлаш бўйича ўзаро ҳамкорликни ривожлантириш, шунингдек, ҳуқуқни муҳофаза қилиш фаолиятининг энг долзарб масалалари бўйича комплекс илмий тадқиқотларни тизимли равишда олиб боришга қаратилган.

Учрашув давомида томонлар ўзаро ҳамкорликнинг истиқболли йўналишларини муҳокама қилиб, келгусида энг муҳим соҳалар бўйича амалий ишларни йўлга қўйиш юзасидан келишиб олдилар. Хусусан, юридик фан ва ҳуқуқни қўллаш амалиётининг долзарб муаммолари, қонун устуворлиги ва ҳуқуқий тартибни мустаҳкамлаш масалалари бўйича фундаментал ва амалий илмий тадқиқотлар ўтказиш, бакалавриат, магистратура ва докторантура босқичларида таҳсил олаётганлар учун илмий стажировкалар ва касбий амалиётларни ташкил этиш орқали академик мобилликни кучайтириш, шунингдек, ҳуқуқни қўллаш амалиёти масалаларига бағишланган ўқув-услубий қўлланмалар ва тавсиялар ишлаб чиқиш ҳамда нашр этиш бўйича келишувларга эришилди.

Ҳамкорлик меморандумининг имзоланиши икки академия ўртасидаги илмий ва амалий ҳамкорликни янги босқичга олиб чиқишда муҳим қадам бўлиб, кадрлар салоҳиятини ривожлантириш ва илмий-таълим муҳитини мустаҳкамлашга қаратилган барқарор шериклик учун мустаҳкам замин яратди.