Коррупцияга қарши курашда тизимли ёндашув: комплаенс бўлинмаларининг ўрни эътибор марказида

Ҳуқуқни муҳофаза қилиш академияси мамлакатимизда амалга оширилаётган коррупцияга қарши курашиш бўйича комплекс чора-тадбирларни ҳаётга татбиқ этишда фаол иштирок этиб келмоқда.

Ўзбекистон Республикаси Президентининг Олий Мажлис ва Ўзбекистон халқига Мурожаатномасида белгилаб берилган коррупцияга қарши курашиш соҳасидаги топшириқларни ижро этиш доирасида, Ўзбекистон Республикаси Президенти Администрацияси ташаббуси билан Академияда давлат идораларнинг коррупцияга қарши ички назорат (комплаенс) тузилмалари раҳбарлари иштирокида йиғилиш ташкил этилди.

Тадбирда Ўзбекистон Республикаси Президенти Администрациясининг масъул вакиллари, Олий Мажлис Сенатининг Коррупцияга қарши курашиш ва суд-ҳуқуқ масалалари қўмитаси, Коррупцияга қарши курашиш агентлиги ҳамда Академия раҳбарияти томонидан Давлат раҳбари белгилаб берган вазифаларнинг мазмун-моҳияти тушунтирилиб, коррупция омилларини бартараф этиш борасида мавжуд муаммолар ҳамда уларни ҳал этиш йўллари муҳокама қилинди.

Йиғилишда комплаенс бўлинмалари ходимларининг билим даражасини ошириш, касбий кўникма ва компетенцияларини шакллантиришнинг аҳамияти алоҳида таъкидланиб, бу борада Коррупцияга қарши курашиш виртуал академияси электрон платформасининг имкониятларидан кенг фойдаланиш масалалари муҳокама қилинди. Ушбу йўналишда Академияда малакали кадрлардан иборат жамоа шакллантирилгани ҳамда самарали халқаро ҳамкорлик йўлга қўйилгани қайд этилди.

Кун тартибига киритилган масалалар юзасидан вазирлик ва идораларнинг коррупцияга қарши ички назорат бўлинмалари раҳбарлари томонидан таклиф ва фикр-мулоҳазалар тингланди, шунингдек келгусида амалга оширилиши лозим бўлган чора-тадбирлар белгилаб олинди.