Мажбурий ижро бюроси ходимлари учун ўқув-семинари

Бош прокуратура Академияси томонидан жорий йилнинг 22 декабрь куни Мажбурий ижро бюроси билан ўзаро ҳамкорликда Бюро фаолиятида тизимли равишда юзага келаётган камчиликлар ва муаммоларни олдини олиш ҳамда уларни бартараф этишга қаратилган видеоконференцалоқа режимида ўқув-семинари ўтказилди.

Мазкур тадбирда Бош прокуратура Академиясининг профессор-ўқитувчилари, Мажбурий ижро бюроси марказий маҳкамаси ходимлари, Бюронинг барча вилоят ҳамда туман (шаҳар) суд ҳужжатлари ва бошқа органлар ҳужжатларини ижро этиш бўлимлари инспекторлари, давлат ижрочилари, шунингдек вилоят прокуратураларининг суд ҳужжатлари ва бошқа органлар ҳужжатларини ижро этишда қонунчилик ижроси устидан назорат қилиш бўлими бошлиқлари иштирок этдилар.

Ўқув-семинар давомида ижро ҳужжатлари ижросини таъминлашда халқаро ҳуқуқ нормаларини қўллаш, жиноий жарималарни ундириш, қарздорларни қидириш ва уларнинг четга чиқиш ҳуқуқларини вақтинча чеклаш, “МИБ-ижро” электрон дастурий таъминотини амалиётда қўллашга доир мавжуд муаммолар ва камчиликларни бартараф этишга қаратилган масалалар атрофлича муҳокама этилди.

Тадбир давомида бюро фаолиятининг иш самарадорлигини ошириш ҳамда илғор амалий тажрибаларни кенг жорий этиш мақсадида бюро фаолиятида тизимли равишда йўл қўйилаётган камчиликлар ва юзага келаётган муаммоларнинг таҳлили ҳамда унинг натижасидан келиб чиқиб, аниқланган ҳолатларни олдини олиш ва бартараф этиш бўйича тегишли тавсия ҳамда кўрсатмалар берилди.

Тадбир якунида ходимларга соҳага оид қонунчиликдаги ўзгаришлар ва янгиликларни мазмуни ҳақида батафсил тушунтиришлар берилиб, вилоят студияларида қатнашаётган иштирокчилар томонидан амалиётда юзага келаётган муаммолар юзасидан савол-жавоблар ўтказилди.