Лунд университети билан узоқ муддатли ҳамкорлик доирасида академик мулоқот

Ўзбекистон Республикаси Ҳуқуқни муҳофаза қилиш академиясида Лунд университети (Швеция Қироллиги) Ҳуқуқ социологияси департаменти раҳбари Анна Лундберг билан учрашув бўлиб ўтди.

Учрашув давомида Анна Лундберг Академия фаолиятининг асосий жиҳатлари, унинг ташкилий тузилмаси, прокуратура ва тергов органлари ходимларини тайёрлаш, қайта тайёрлаш ҳамда малакасини оширишнинг ўзига хос хусусиятлари, шунингдек таълим ва илмий-тадқиқот жараёнини ташкил этиш амалиёти билан батафсил таништирилди.

Учрашув чоғида болалар ҳуқуқларини ҳимоя қилиш масалалари, ушбу соҳадаги илмий-таълим фаолиятининг долзарб жиҳатлари, шунингдек миллий қонунчиликдаги ўзгартиш ва қўшимчалар юзасидан мазмунли фикр алмашинуви бўлиб ўтди. Шу билан бирга, тажриба алмашиш, қўшма илмий тадқиқотлар ва лойиҳаларни амалга ошириш орқали ҳамкорликни янада мустаҳкамлаш истиқболларига алоҳида эътибор қаратилди.

Ташриф доирасида Анна Лундберг Академиянинг моддий-техника базаси, ихтисослаштирилган ўқув аудиториялари ва илмий лабораториялари билан танишди. Таълим жараёнида қўлланилаётган замонавий ва инновацион ёндашувлар меҳмонда катта қизиқиш уйғотиб, ижобий баҳоланди.