Аниқлик, тезлик, ғалаба: отиш тайёргарлиги бўйича мусобақа

Ҳуқуқни муҳофаза қилиш академиясида Ўзбекистон Республикаси Қуролли Кучлари ташкил этилганининг 34 йиллиги ҳамда Ватан ҳимоячилари кунига бағишлаб бакалавриат талабалари ўртасида отиш тайёргарлиги доирасида Макаров пистолетини нотўлиқ қисмларга ажратиш ва йиғиш тартиби бўйича бўйича мусобақа ўтказилди.

Мусобақада Академия бакалавриатининг барча курслари талабаларидан иборат жамоалар иштирок этди. Иштирокчиларнинг тайёргарлик даражаси Ўзбекистон Республикаси Миллий гвардияси ҳарбий хизматчилари ҳамда Академия ходимларидан иборат ҳакамлар ҳайъати томонидан баҳоланди. Белгиланган машқни бажаришда аниқлик ва тезкорлик асосий баҳолаш мезонлари сифатида белгиланди.

Мусобақа якунларига кўра, биринчи ўринни “Прокурорлик фаолияти” таълим йўналиши 1-курс 2-гуруҳ жамоаси эгаллади. Иккинчи ўрин “Прокурорлик фаолияти” таълим йўналиши 1-курс рус тилида таълим олувчи гуруҳ жамоасига насиб этди. Учинчи ўринни эса “Тергов фаолияти” таълим йўналиши 1-курс 1-гуруҳ жамоаси қўлга киритди.

Мусобақа соғлом рақобат ва спортча беллашув муҳитида ўтди. Ғолиб ва совриндор жамоалар кубок, диплом, медаль ҳамда эсдалик совғалари билан тақдирланди.

Талабаларда амалий кўникмаларни шакллантириш, интизом ва жамоавийлик руҳини мустаҳкамлашга қаратилган бундай тадбирларни Академияда доимий ва тизимли равишда ташкил этиш режалаштирилган.