Гданьск университети билан ҳамкорлик истиқболлари муҳокама қилинди

Ўзбекистон Республикаси Ҳуқуқни муҳофаза қилиш академиясида Польша Республикасининг Гданьск университети профессори Эдвардас Юхневичус билан ишчи учрашув бўлиб ўтди.

Учрашув давомида томонлар олий таълим муассасалари ўртасидаги икки томонлама ҳамкорликни ривожлантиришга оид долзарб масалаларни муҳокама қилдилар. Хусусан, академик алмашинув дастурларини кенгайтириш, профессор-ўқитувчилар таркибининг малакасини ошириш, стажировкаларни ташкил этиш, шунингдек қўшма таълим ва илмий тадбирларни ўтказиш масалаларига алоҳида эътибор қаратилди.

Бундан ташқари, кадрлар тайёрлаш соҳасида ўзаро ҳамкорликни чуқурлаштириш, академик ва илмий-тадқиқот тажрибалари алмашинувини йўлга қўйиш, шунингдек қўшма ташаббусларни амалий жиҳатдан рўёбга чиқаришга қаратилган барқарор ҳамкорлик форматларини шакллантириш имкониятлари муҳокама қилинди.

Учрашув якунлари бўйича томонлар ҳамкорлик муносабатларини янада ривожлантиришдан манфаатдор эканликларини билдириб, эришилган келишувларни босқичма-босқич амалга оширишга тайёр эканликларини тасдиқладилар.