Молиявий хавсизлик ва киберхавфсизликни ҳуқуқий жиҳатдан таъминлашда Европа тажрибаси: навбатдаги академик мулоқот тафсилотлари

Ўзбекистон Республикаси Ҳуқуқни муҳофаза қилиш академиясида Польша Республикасининг Гданьск университети ҳуқуқ ва бошқарув факультети профессори иштирокида магистратура тингловчилари учун академик мулоқот ташкил этилди.

Маъруза доирасида молиявий хавфсизликни ҳуқуқий таъминлаш, рақамли молиявий жараёнларни тартибга солиш, шунингдек киберҳуқуқ ва киберхавфсизлик тизимини шакллантиришга доир замонавий ёндашувлар изчил тарзда кўриб чиқилди. Ушбу мавзуларни муҳокама қилиш рақамлаштириш шароитида ҳуқуқий тизимларнинг трансформацияси ва трансчегаравий хатарлар ортиб бораётгани контекстида олиб борилди.

Маъруза давомида Европа Иттифоқи давлатларининг ноқонуний молиявий операцияларга қарши курашиш, молиявий тизимлар барқарорлигини таъминлаш ҳамда киберхатарларга нисбатан ҳуқуқий жавоб механизмларини ривожлантириш борасидаги амалиётига алоҳида эътибор қаратилди. Шунингдек, киберҳуқуқ соҳасида халқаро ҳамкорлик, ҳуқуқий ёндашувларни яқинлаштириш, шахсий маълумотларни ҳимоя қилиш ва ахборот хавфсизлигини таъминлаш масалалари муҳокама қилинди.

Академик мулоқот формати магистратура тингловчиларига хорижий тажриба билан танишиш билан бир қаторда, тақдим этилган ҳуқуқий моделларни муаммоли вазиятлар муҳокамаси ва амалий кейслар таҳлили орқали танқидий англаш имконини берди. Бу эса молиявий ва рақамли хавфсизлик соҳасидаги замонавий чақириқлар бўйича комплекс тасаввур ҳамда таҳлилий фикрлаш кўникмаларини шакллантиришга хизмат қилади.

Мазкур тадбир Ҳуқуқни муҳофаза қилиш академиясида халқаро академик ҳамкорликни ривожлантириш стратегиясига уйғун тарзда ўтказилиб, Гданьск университет билан қўшма таълим ва илмий-тадқиқот ташаббусларини янада кенгайтириш учун мустаҳкам мазмунли асос яратди.