Ҳуқуқни муҳофаза қилиш соҳасидаги замонавий чақириқларга бағишланган халқаро илмий-амалий конференция материаллари нашр этилди

Ўзбекистон Республикаси Ҳуқуқни муҳофаза қилиш академияси томонидан «Рақамли трансформация даврида ҳуқуқни муҳофаза қилиш соҳасидаги замонавий чақириқ ва таҳдидлар» мавзусида ўтказилган халқаро илмий-амалий конференция материалларининг 2 жилдлик тўплами нашр этилди.

Тўпламда ҳуқуқни муҳофаза қилиш соҳасидаги илмий-тадқиқотлар ва амалиёт учун долзарб бўлган қатор масалалар қамраб олинган. Хусусан, илмий тадқиқотларни амалга оширишда коррупциявий-бюрократик тўсиқларни бартараф этиш, таълим, фан ва амалиёт интеграциясининг ретроспектив ва замонавий ёндашувлари, юридик мавзудаги илмий ишлар ёзишда сунъий интеллект технологияларидан фойдаланишнинг айрим жиҳатлари, юридик фан ва ҳуқуқни қўллаш амалиётида ягона ёндашувни шакллантириш масалалари кенг ёритилган.

Шунингдек, инсон ҳуқуқлари бўйича таълимни амалга оширишнинг халқаро-ҳуқуқий асослари, ахборот-коммуникация технологияларидан фойдаланган ҳолда содир этилган жиноятларни тергов қилиш жараёнида сўроққа тайёргарлик кўриш тактикаси, юридик фаннинг турли соҳаларида мавжуд муаммолар ҳамда уларнинг илмий ва амалий ечимлари таҳлил қилинган.

Тўпламдан Жанубий Корея, АҚШ, Испания, Франция, Швеция, Туркия, Россия, Беларусь Республикасининг юридик соҳадаги етук олимлари, халқаро ташкилотларнинг малакали мутахассислари, шунингдек мамлакатимизда юридик фан соҳасида фаолият юритаётган профессор-ўқитувчилар, докторантлар, мустақил изланувчилар ва ёш олимларнинг илмий мақолалари ҳамда тезислари ўрин олган.

Нашр этилган тўплам ҳуқуқни муҳофаза қилиш соҳасидаги илмий фикр алмашувини кенгайтириш, илмий тадқиқотлар натижаларини амалиётга жорий этиш ва соҳадаги замонавий ёндашувларни ривожлантиришга хизмат қилади.