Ҳодиса жойини кўздан кечириш бўйича халқаро стандартлар: Академияда семинар-тренинг ўтказилди

Ҳуқуқни муҳофаза қилиш академиясида БМТ Гиёҳвандлик ва жиноятчилик бўйича бошқармаси (UNODC) ҳамда АҚШ Давлат департаментининг гиёҳванд моддаларнинг халқаро айланмасига қарши курашиш ва ҳуқуқни муҳофаза қилиш масалалари бўйича бюроси (INL) билан ҳамкорликда прокуратура органлари терговчилари ва эксперт-криминалистлар учун «Ҳодиса содир бўлган жойни кўздан кечириш ва бошқариш» мавзусида беш кунлик халқаро семинар-тренинг ташкил этилди.

Семинар доирасида иштирокчилар ҳодиса жойидаги дастлабки ҳаракатларни халқаро стандартлар ҳамда илғор хорижий амалиёт асосида ташкил этиш, далилларни тўғри йиғиш, ҳужжатлаштириш ва сақлаш бўйича ўз касбий билим ва кўникмаларини оширдилар.

Тадбирнинг очилиш маросимида Академия бошлиғининг биринчи ўринбосари, юридик фанлар бўйича фалсафа доктори (PhD), профессор Е.В.Коленко, БМТ Гиёҳвандлик ва жиноятчилик бўйича бошқармасининг минтақавий ваколатхонаси раҳбари доктор Оливер Штольпе ҳамда АҚШ элчихонасининг INL бўлими директори Натаниэль Реттенмейер иштирок этдилар. Ўз чиқишларида улар одил судловнинг самарадорлиги, аввало, ашёвий далилларнинг ишончли йиғилиши, уларни тўғри ҳужжатлаштириш ва «сақланиш занжири» тамойилига қатъий риоя этилиши билан бевосита боғлиқ экани таъкидланди.

Семинарнинг асосий эътибори терговчи ва эксперт-криминалистларнинг ҳодиса жойидаги ўзаро ҳамкорлигини кучайтириш, далилларни йиғиш жараёнида юзага келиши мумкин бўлган техник хатоликларни бартараф этиш ҳамда жиноятларни фош этиш сифатини ошириш масалаларига қаратилди.

Ўқув дастури давомида иштирокчилар назарий билимларини амалий машғулотлар билан мустаҳкамлаб, реал ҳолатларга яқинлаштирилган сценарийлар асосида портлаш жойини кўздан кечириш, ДНК намуналари билан ишлаш, рақамли далилларни йиғиш ва ҳужжатлаштириш каби мураккаб йўналишларда амалий кўникмаларни эгалладилар.

Семинар якунида иштирокчилар замонавий криминалистик технологиялардан самарали фойдаланиш, далилларни экспертизага сифатли тайёрлаш ҳамда тергов жараёнида халқаро стандартларга мувофиқ иш юритиш бўйича муҳим профессионал компетенцияларни мустаҳкамладилар.