Нобанк кредит секторда ички назорат самарадорлигини ошириш: амалий ёндашув

Ҳуқуқни муҳофаза қилиш академиясида Молия бозори иштирокчилари миллий ассоциацияси аъзоси бўлган ташкилотлар ходимлари учун нобанк кредит секторда жиноий фаолиятдан олинган даромадларни легаллаштиришга ҳамда терроризмни молиялаштиришга қарши курашиш масалаларига бағишланган ихтисослаштирилган ўқув курси ўтказилди.

Ўқув курсида микрокредит ташкилотлари ва ломбардларнинг ички назорат хизматлари фаолияти учун масъул бўлган ходимлар иштирок этди.

Курс дастури жиноий фаолиятдан олинган даромадларни легаллаштиришга ва терроризмни молиялаштиришга қарши курашиш миллий тизимининг амал қилиш механизмларини комплекс тарзда кўриб чиқишга, шу жумладан миллий ва соҳавий даражада рискларни баҳолаш масалаларига, шунингдек, мақсадли молиявий санкцияларни қўллаш амалиётига йўналтирилди.

Курс доирасида тингловчиларда самарали ички назорат тизимини ташкил этиш, соҳавий рискларни аниқлаш ва баҳолаш, шунингдек, махсус ваколатли давлат органига мажбурий тарзда хабар қилиниши лозим бўлган операцияларни белгилаш бўйича амалий кўникмаларни шакллантиришга алоҳида эътибор қаратилди.

Мазкур ўқув курсини ўтказиш нобанк кредит ташкилотлари ходимларининг касбий тайёргарлик даражасини оширишга, ПОД/ФТ соҳасида қонунчилик талабларини амалга оширишда амалий ёндашувларни мустаҳкамлашга, шунингдек, молия секторда ички назорат тизимини ташкил этиш бўйича ягона ва барқарор ёндашувларни шакллантиришга хизмат қилади.