Китоб билан учрашув: Академия талабалари Олим Отахон хотира кечасида

Ўзбекистон Республикаси Президентининг 2026 йил
15 январдаги “Китобхонлик маданиятини ривожлантириш ва аҳоли ўртасида китоб ўқишга қизиқишни ошириш чора-тадбирлари тўғрисида”ги ПҚ-9-сон Қарори ижроси доирасида Ҳуқуқни муҳофаза қилиш академиясида талабалар ўртасида китобхонлик маданиятини юксалтиришга қаратилган маънавий-маърифий тадбирлар изчил ташкил этилмоқда.

Шу мақсадда таниқли ёзувчи ва таржимон Олим Отахон таваллудининг 75 йиллиги муносабати билан Ўзбекистон Ёзувчилар уюшмаси томонидан ўтказилган хотира кечасига Академиянинг бакалавриат босқичи талабалари ташрифи ташкил этилди.

Ижодий кеча давомида иштирокчилар Олим Отахоннинг насрий мероси, унинг адабий услуби ва таржима мактабига қўшган ҳиссаси ҳақида атрофлича маълумотларга эга бўлиб, адабиёт аҳли билан учрашиш, савол-жавоб қилиш ва фикр алмашиш имкониятини қўлга киритдилар. Манбаларда Олим Отахоннинг «Болалик кабутарлари», «Оқшом хаёллари», «Озод қушлар ҳақида қисса», «Адоқсиз кўчалар» каби асарлари, шунингдек, жаҳон адабиёти намуналаридан қилган таржималари ҳам эътироф этилган.

Тадбир якунида талабаларга Ўзбекистон Ёзувчилар уюшмаси томонидан нашр қилинган китоблар совға қилинди. Мазкур ташаббус талабаларда китобга меҳрни мустаҳкамлаш, мутолаа маданиятини ривожлантириш, бадиий тафаккур ва ижодий дунёқарашни кенгайтиришга хизмат қилади.