Жиноий одил судловга оид қўшма лойиҳа муҳока қилинди

Ҳуқуқни муҳофаза қилиш академиясида Европа комиссиясининг ташқи сиёсат воситалари хизмати, Халқаро одил судлов ва қонун устуворлиги институти (IIJ) ҳамда Hedayah ташкилоти вакилларидан иборат делегация, шунингдек Олий суд, Бош прокуратура, Адлия вазирлиги ва Академия вакиллари иштирокида учрашув бўлиб ўтди.

Учрашув давомида ҳарбий можаро зоналаридан қайтган шахсларни жиноий жавобгарликка тортиш, реабилитация қилиш ва жамиятга қайта интеграциялашга қаратилган қўшма лойиҳани амалга ошириш масалалари муҳокама қилинди. Қайд этилганидек, мазкур лойиҳа жиноят одил судлови соҳасида фаолият юритаётган амалий ходимлар салоҳиятини ошириш, касбий кўникмаларни ривожлантириш, илғор халқаро тажриба, билим ва малака алмашишга, шунингдек қонунчилик ҳамда ҳуқуқни қўллаш амалиётини такомиллаштиришга хизмат қилади. Лойиҳани амалга ошириш хавфсизликни таъминлаш, адолат тамойилларини мустаҳкамлаш ҳамда инсон ҳуқуқларини ҳимоя қилишга қаратилгани таъкидланди.

Шу билан бирга, Ҳуқуқни муҳофаза қилиш академияси вакиллари ҳамда Халқаро одил судлов ва қонун устуворлиги институти лойиҳаси раҳбари К.Балтазар ўртасида икки томонлама мулоқот ўтказилди. Унда IIJ институтининг мандати, асосий фаолият йўналишлари ҳамда таълим дастурлари тўғрисида маълумот берилди.

Томонлар қўшма лойиҳани амалга ошириш бўйича йўл харитасини шакллантириш юзасидан фикр ва таклифлар алмашиб, ҳамкорликни янада мустаҳкамлаш бўйича келишувга эришдилар.

Учрашувлар якунлари бўйича томонлар қўшма лойиҳани қўллаб-қувватлашини билдириб, уни изчил амалга оширишга тайёр эканликларини тасдиқладилар.