Тошкент шаҳри маҳаллаларида жиноятчиликнинг барвақт олдини олиш ва криминоген вазиятни илмий ёндашув асосида ўрганиш ишлари олиб борилмоқда

Ўзбекистон Республикаси Президентининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги ПҚ-1-сон ҳамда “2026 йилда республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги ПҚ-2-сон қарорлари ижросини таъминлаш мақсадида Ҳуқуқни муҳофаза қилиш академияси томонидан Тошкент шаҳри маҳаллаларида комплекс ўрганиш ишлари амалга оширилмоқда.

Мазкур ишлар доирасида Академия бошлиғининг биринчи ўринбосари Е. Коленко бошчилигидаги ишчи гуруҳ Олмазор тумани прокуратураси ҳамда туман ички ишлар органлари фаолиятини мувофиқлаштириш бошқармаси ходимлари билан учрашувлар ўтказиб, “илмий хулоса – амалий тавсия – натижа” тамойили асосида ҳуқуқбузарликларнинг барвақт олдини олиш ва ҳудуддаги криминоген вазиятни яхшилашга қаратилган таклиф ва тавсиялар ишлаб чиқди.

Ўзбекистон Республикаси Президенти Шавкат Мирзиёев раислигида жорий йил 27 январь куни Тошкент шаҳрида хавфсиз муҳитни шакллантириш ҳамда жамоат хавфсизлигини таъминлаш бўйича ўтказилган видеоселектор йиғилишида белгиланган топшириқлар ижросидан келиб чиқиб, тергов сифатини ошириш, унинг шаффофлигини таъминлаш, жиноятларни самарали фош этиш ҳамда кибержиноятларга қарши курашиш тактика ва стратегияларини такомиллаштириш масалаларига алоҳида эътибор қаратилди.

Шу доирада Олмазор тумани прокуратурасида туман прокуратурасига бириктирилган терговчиларнинг амалиёт ўташ жараёнлари, шунингдек прокурор ходимларни ўқитиш самарадорлиги муҳокама қилиниб, мавжуд камчиликларни бартараф этиш бўйича таклифлар берилди.

Туман ички ишлар органларида навбатчи қисм фаолияти, фуқаролар мурожаатлари ва аризалар билан ишлаш ҳолати ўрганилди. Тергов бўлимида эса терговчилар билан иш юритувидаги жиноят ишлари юзасидан амалий муҳокамалар ўтказилиб, тергов ҳаракатларини ташкил этиш ва процессуал ҳужжатларни расмийлаштириш бўйича аниқ тавсиялар берилди. Терговчиларни ўқитиш ишларини режа-график асосида ташкил этиш масалалари келишиб олинди.

Бундан ташқари, Академия талабаларининг дуал таълим асосида тергов, профилактика ва жамоат тартибини сақлаш хизматларида амалиёт ўташ тартибини такомиллаштириш бўйича талаблар белгилаб олинди.

Ишчи гуруҳ томонидан Олмазор туманининг қатор маҳаллаларида ҳам ўрганиш ишлари олиб борилди. Маҳаллада ҳуқуқбузарлик ва жиноятларнинг содир этилишига таъсир этувчи сабаб ва омиллар, жиноятга замин яратаётган шарт-шароитлар, ижтимоий-маиший муаммолар ҳамда амалга оширилаётган профилактик чора-тадбирлар илмий ёндашув асосида таҳлил қилинди.

Шунингдек, туман маҳаллаларида маҳалла еттилиги аъзоларини ўқитиш бўйича эҳтиёжлар ўрганилиб, уларнинг билим ва кўникмаларини оширишга қаратилган ўқув машғулотларини ташкил этиш масалалари муҳокама қилинди.

Ўрганишлар якунлари бўйича ишлаб чиқилган таклиф ва тавсиялар умумлаштирилиб, ҳудуддаги криминоген вазиятни яхшилашга қаратилган келгусидаги йўл хариталарига киритиш учун масъул идораларга тақдим этилди.

Ҳуқуқни муҳофаза қилиш академияси ишчи гуруҳининг маҳаллаларда хавфсиз муҳитни яратиш ҳамда ҳуқуқбузарликларнинг барвақт олдини олиш тизими самарадорлигини оширишга қаратилган ўрганиш ишлари изчил давом эттирилмоқда.