Академияда талабаларни амалий фаолиятга тайёрлашга қаратилган дуал таълим модели изчил равишда жорий этилмоқда. Хусусан, «Тергов фаолияти» йўналиши бўйича таҳсил олаётган бакалавриат талабалари Тошкент шаҳар ички ишлар органларининг тергов бўлинмаларида ўқув-амалий машғулотларни ўтамоқда.
Дуал таълимнинг мазкур босқичи доирасида Тошкент шаҳар Ички ишлар бош бошқармасида тергов тармоқлари раҳбарлари ҳамда Академия профессор-ўқитувчилари иштирокида дуал таълимнинг сифати ва самарадорлигини ошириш масалаларига бағишланган давра суҳбати бўлиб ўтди.
Муҳокамалар давомида талабаларнинг ҳуқуқбузарликлар профилактикаси ва жиноятчиликка қарши курашишга қаратилган амалий тадбирларда бевосита иштирок этиши, шунингдек, мутахассислик фанлари бўйича эгалланган назарий билим ва амалий кўникмаларни хизмат фаолияти жараёнида қўллаш масалаларига алоҳида эътибор қаратилди.
Ўқув-амалий топшириқлар Академия профессор-ўқитувчилари ҳамда амалиёт жойларига бириктирилган мураббийлар раҳбарлиги остида бажарилади.
Талабалар шунингдек турли тергов ҳаракатларида бевосита иштирок этиб, тергов-процессуал ҳужжатлар намуналарини тайёрлаш, дастлабки тергов материалларини ўрганиш ва таҳлил қилиш, шунингдек, тергов фаолияти доирасида касбий мулоқот кўникмаларини шакллантиришга қаратилган амалий машғулотларни ўтамоқда.
Бу эса талабаларнинг амалий муҳитга босқичма-босқич мослашувини таъминлаш ҳамда уларнинг келгуси касбий фаолиятга тайёрлигини оширишга хизмат қилади.