Маҳаллаларда хавфсиз муҳитни таъминлашга қаратилган илмий ёндашув амалиётга татбиқ этилмоқда

Ўзбекистон Республикаси Президентининг 2026 йил 5 январдаги «Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида»ги ПҚ-1-сон ҳамда «2026 йилда республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида»ги ПҚ-2-сон қарорлари ижросини таъминлаш мақсадида Ҳуқуқни муҳофаза қилиш академияси томонидан маҳаллаларда «илмий хулоса – тавсия – натижа» тамойили асосида ишчи гуруҳ фаолияти йўлга қўйилган.

Ишчи гуруҳ томонидан маҳаллаларда криминоген вазиятга таъсир этувчи асосий сабаб ва омиллар, жиноят содир этилишига замин яратаётган шарт-шароитлар, шунингдек, мавжуд ижтимоий-маиший муаммолар комплекс тарзда таҳлил қилинмоқда.

Хусусан, ишчи гуруҳи аъзолари томонидан Тошкент вилоятининг Ангрен ва Олмалиқ шаҳарлари маҳаллаларига чиқиб, ҳуқуқбузарлик ва жиноятларни ўз вақтида аниқлаш ҳамда уларнинг олдини олиш масалалари илмий ёндашувлар асосида ўрганилди.

Жумладан, Ангрен шаҳридаги “Озодлик”, “Аппартак”, “Янгиобод” ва “Бўстон” маҳаллаларида ўрганиш ишлари олиб борилиб, масъул ходимлар ва маҳалла фаоллари иштирокида ҳуқуқбузарлик ва жиноятларни ўз вақтида аниқлаш ҳамда уларнинг олдини олиш масалалари муҳокама қилинди.

Мутахассислар томонидан маҳалла ҳудудида содир этилган жиноятлар таҳлил қилиниб, ҳуқуқбузарликлар сабаблари, уларнинг олдини олиш чоралари ҳамда профилактик ҳисобда турган шахслар билан ишлаш жараёнлари атрофлича ўрганилди. Ўрганиш натижаларига кўра, криминоген вазиятни яхшилаш, профилактик ишлар самарадорлигини ошириш ва маҳаллада жамоат хавфсизлигини таъминлаш бўйича бир қатор таклиф ва тавсиялар ишлаб чиқилди.

Шунингдек, Олмалиқ шаҳрининг “А.Навоий”, “М.Улуғбек”, “Темур Малик” ҳамда “Ҳамза” маҳаллаларида содир этилишининг олдини олиш мумкин бўлган жиноятлар юзасидан тегишли масъуллар билан муҳокамалар ўтказилиб, аҳолининг ҳуқуқий маданиятини оширишга қаратилган манзилли таклифлар ишлаб чиқилди.

Академия мутахассислари томонидан ҳудуддаги криминоген вазиятнинг кундалик таҳлили асосида ишлаб чиқилган хулосалар ва таклифлар маҳаллаларда хавфсиз муҳитни яратиш ҳамда ҳуқуқбузарликларнинг олдини олиш тизими самарадорлигини янада оширишга хизмат қилмоқда.