Академияда терроризмга қарши кураш соҳасида БМТ Хавфсизлик Кенгаши резолюцияларини амалга ошириш бўйича минтақавий мулоқот

Ҳуқуқни муҳофаза қилиш академиясида «БМТ Хавфсизлик Кенгашининг терроризмга қарши кураш соҳасидаги резолюциялари мақсадлари: 1267 (1999), 1989 (2011), 2253 (2015) ва 1988 (2011)-сонли резолюцияларга мувофиқ санкция режимларини амалга ошириш бўйича илғор тажриба» мавзусида минтақавий давра суҳбати бўлиб ўтди.

Тадбир Ўзбекистон Республикаси Давлат хавфсизлик хизмати, БМТнинг Аксилтеррор маркази (КТЦ ООН), БМТнинг Аксилтеррор бошқармаси (КТУ ООН), БМТ Хавфсизлик Кенгашининг 1526 (2004) ва 2253 (2015)-сонли резолюциялари билан тасдиқланган санкциялар бўйича таҳлилий қўллаб-қувватлаш ва кузатиш гуруҳи, шунингдек, Марказий Осиё учун БМТнинг Превентив дипломатия бўйича минтақавий маркази (РЦПДЦА) билан ҳамкорликда ташкил этилди.

Тадбирда Қозоғистон, Қирғизистон, Тожикистон, Туркманистон ва Ўзбекистон Республикасининг хавфсизлик органлари ҳамда молиявий разведка бўлинмалари вакиллари иштирок этди.

Шунингдек, мулоқотда БМТнинг Аксилтеррор маркази ва Аксилтеррор бошқармаси маслаҳатчилари ҳамда экспертлари, санкциялар бўйича таҳлилий қўллаб-қувватлаш ва кузатиш гуруҳи, Марказий Осиё учун БМТнинг Превентив дипломатия бўйича минтақавий маркази, Европада хавфсизлик ва ҳамкорлик ташкилоти, Мустақил давлатлар ҳамдўстлигининг Аксилтеррор маркази, Жиноий даромадларни легаллаштиришга ва терроризмни молиялаштиришга қарши курашиш бўйича Евроосиё гуруҳи, Коллектив хавфсизлик тўғрисидаги шартнома ташкилоти ҳамда Шанхай ҳамкорлик ташкилотининг минтақавий аксилтеррор тузилмаси вакиллари иштирок этдилар.

Давра суҳбати БМТ Хавфсизлик Кенгашининг терроризмга қарши кураш соҳасидаги резолюцияларининг мақсад ва талабларини чуқурроқ англаш, миллий тузилмалар томонидан рўйхатга киритилган шахсларга нисбатан чоралар кўриш ва уларни рўйхатдан чиқариш жараёнларида юзага келаётган муаммоларни аниқлаш масалаларига бағишланди. Шунингдек, институционал мувофиқлаштиришни таъминлаш, ахборот алмашинувини йўлга қўйиш ҳамда инсон ҳуқуқларига риоя этилишини таъминлаш масалалари муҳокама қилинди.

Иштирокчилар санкция режимларини, жумладан активларни музлатиш, сафарларга тақиқ қўйиш ва қурол-яроғ етказиб беришга эмбарго жорий этиш чораларини миллий даражада амалга ошириш жараёнида эришилган илғор тажриба ҳамда чиқарилган сабоқлар билан ўзаро алмашдилар.

Тадбир БМТ Хавфсизлик Кенгаши резолюцияларини амалга ошириш соҳасида аъзо давлатлар салоҳиятини мустаҳкамлашга, шунингдек, Марказий Осиё мамлакатлари ўртасида ҳамда БМТ агентликлари, минтақавий ва халқаро ташкилотлар билан ҳамкорликни янада ривожлантиришга хизмат қилди.