Ўзбекистон Республикаси Президенти раислигида жорий йил 27 январь куни ўтказилган видеоселектор йиғилишида тергов сифатини тубдан ошириш ва унинг шаффофлигини таъминлаш бўйича берилган топшириқлар ижросини тўлақонли таъминлашга қаратилган тизимли ишлар изчил давом эттирилмоқда.
Хусусан, Олмазор, Бектемир ва Сергели туманлари ИИО ФМБнинг терговчилари ҳамда Олмазор туман ИИО ва ФМБ ҳузуридаги ТБ таркибидаги ихтисослаштирилган терговга қадар текширув гуруҳларининг профилактика инспекторлари учун терговга қадар текширув фаолиятига оид долзарб масалаларга бағишланган махсус масофавий малака ошириш курси ташкил этилди.
Мазкур курс дастурида терговга қадар текширув фаолияти, терговга қадар текширув ўтказиш тартиби ва муддатлари; жиноятга оид аризалар, хабарлар ва маълумотларнинг турлари ҳамда уларни кўриб чиқиш тартиби; терговга қадар текширувда ҳамкорлик масалалари; жиноят ишини қўзғатиш сабаблари ва асослари, жиноят ишини қўзғатишни рад қилиш тартиби, шунингдек, терговга қадар текширувда кечиктириб бўлмас тергов ҳаракатлари қамраб олинган.
Шу билан бирга, туманда жиноятларни тергов қилиш сифатини янгича ёндашувлар асосида ташкил этиш мақсадида Олмазор тумани ИИО ФМБнинг терговчилари учун «Жиноятларни квалификация қилиш, дастлабки терговни ташкил этиш ва ўтказишнинг долзарб масалалари» мавзусида анъанавий шаклдаги малака ошириш курси ҳам йўлга қўйилди.
Мазкур малака ошириш курси жорий йилнинг февраль ойидан сентябрь ойигача ўтказилиб, машғулотлар икки гуруҳга бўлинган ҳолда интерактив методлар, мунозара ва муҳокама шаклида ташкил этилади.
Курс дастури кибержиноятларни тергов қилиш, рақамли криминалистика; тергов жараёнида рақамли очиқ маълумотлардан фойдаланиш; экспертиза тайинлаш билан боғлиқ процессуал масалалар; жиноятларни тергов қилиш ва квалификация қилишнинг долзарб масалалари, шунингдек, айрим мураккаб турдаги жиноятларни тергов қилиш методикаси, тактикаси ва стратегияларини қамраб олган.
Шунингдек, Олмазор тумани терговчиларига амалий ёрдам кўрсатиш мақсадида Ҳуқуқни муҳофаза қилиш академиясининг тергов фаолияти соҳасида кўп йиллик амалий тажрибага эга бўлган профессионал ходимлари жалб қилинди.
Мазкур ишчи гуруҳ Олмазор туман ИИБ терговчилари иш юритувидаги жиноят ишларининг ўз вақтида ва сифатли тергов қилинишини таъминлашга кўмаклашади ҳамда мунтазам равишда ИИБ Тергов бўлимига чиққан ҳолда терговчиларга амалий ёрдам кўрсатади.
Бундан ташқари, Академия ходимлари томонидан Олмазор тумани ИИБ ФМБда суриштирувчи, терговчи ва бошқа ходимлар учун «Ички ишлар органларида терговга қадар текширувни ташкил этиш ва тегишли процессуал ҳаракатларни ўтказишнинг ўзига хос хусусиятлари» ҳамда «Терговга қадар текширув жараёнида ҳодиса содир бўлган жойни кўздан кечириш тергов ҳаракатини ўтказишнинг ўзига хос жиҳатлари» мавзуларида сайёр ўқув машғулотлари ўтказилди.
Тергов сифатини оширишга қаратилган илмий ёндашув асосидаги амалий ёрдам ва малака ошириш курслари тизимли равишда давом эттирилади.