Ҳуқуқни муҳофаза қилиш академиясида хотин-қизларнинг илмий салоҳиятини ривожлантириш, уларнинг илм-фан ва инновациялар соҳасидаги фаоллигини ошириш масалаларига бағишланган маънавий-маърифий давра суҳбати бўлиб ўтди.
Унда аёлларнинг интеллектуал имкониятларини қўллаб-қувватлаш ва илмий муҳитда тенг иштирокини таъминлашнинг долзарб жиҳатлари муҳокама қилинди.
Тадбирда Ўзбекистон Миллий университети профессори Н.Э.Абдуллаева, социология фанлари доктори, доцент С.М.Каланова ҳамда Тошкент давлат техника университети профессори, фалсафа фанлари доктори Н.Р.Нишонова иштирок этиб, хотин-қизларнинг илм-фан соҳасидаги ўрни, илмий фаолликни ошириш ва замонавий тадқиқот муҳитини шакллантириш масалалари юзасидан маърузалар қилдилар.
Муҳокамалар давомида хотин-қизларни илмий изланишларга кенг жалб этиш, уларнинг интеллектуал салоҳиятини рўёбга чиқариш, илмий раҳбарлик институтини такомиллаштириш ҳамда тажрибали аёл олимларни қўллаб-қувватлаш масалалари атрофлича кўриб чиқилди.
Тадбир хотин-қизларнинг жамият ҳаётидаги ўрнини мустаҳкамлаш, уларнинг илмий салоҳиятини юксалтириш ва мамлакатнинг инновацион ривожига ҳисса қўшишга хизмат қилади.