Ўзбекистон Республикаси Ҳуқуқни муҳофаза қилиш академиясида улуғ шоир ва мутафаккирлар – Алишер Навоий ҳамда Заҳириддин Муҳаммад Бобур таваллуд топган саналар муносабати билан Академия ходимлари иштирокида Маърифат соати бўлиб ўтди.
Тадбирда шоира, Зулфия номидаги Давлат мукофоти совриндори, «Шуҳрат» медали соҳиби Г.Асқарова ҳамда Оила ва хотин-қизлар қўмитаси матбуот котиби – ахборот сиёсати масалалари бўйича маслаҳатчиси С.Боймирзаева иштирок этдилар.
Меҳмонлар ўз чиқишларида улуғ аждодлар меросининг маънавий-тарбиявий аҳамияти, миллий ўзликни англаш ва юксак ахлоқий фазилатларни шакллантиришдаги ўрни ҳақида атрофлича фикр юритдилар. Шоира Г.Асқарова Алишер Навоий ва Заҳириддин Муҳаммад Бобур ижодидан намуналар ўқиб бериш баробарида, ўзининг шеърларидан ҳам парчалар ижро этди. Бу эса тадбирга алоҳида руҳ ва илҳом бағишлади.
Шунингдек, Академия ходимлари томонидан шоира ижодидан шеърлар ўқилди, мазмунли савол-жавоблар ташкил этилди. Жонли мулоқот руҳида ўтган тадбир иштирокчиларда катта таассурот қолдирди.
Маърифат соати миллий меросга ҳурматни мустаҳкамлаш, адабий қадриятларга қизиқишни кучайтириш ҳамда маънавий муҳитни бойитишга хизмат қилди.