Ўзбекистон Республикаси Ҳуқуқни муҳофаза қилиш академиясида прокуратура органлари терговчилари учун “Рақамли технологиялардан фойдаланиш усуллари” мавзусидаги ўқув курси ўтказилди.
Мазкур ўқув курси доирасида прокуратура органлари терговчилари жиноятларни тергов қилиш жараёнида электрон маълумотлар билан ишлаш, жумладан уларни аниқлаш, тўплаш, кўздан кечириш, мустаҳкамлаш ва рақамли далил сифатида мақбуллигини таъминлаш бўйича назарий билим ва амалий кўникмаларини такомиллаштирдилар.
Шунингдек, дастур доирасида очиқ манбалардан олинган маълумотлар асосидаги разведка (OSINT) асосида онлайн терговни амалга ошириш, бунда замонавий технологиялардан фойдаланиш, рақамли криминалистика имкониятларини самарали қўллаш ҳамда трансчегаравий рақамли далилларни тўплаш масалалари бўйича амалий машғулотлар ташкил этилди. Бу эса терговчиларнинг касбий маҳоратини янги босқичга олиб чиқишга хизмат қилади.
Мазкур ўқув курси Ўзбекистон Республикаси Президенти томонидан белгилаб берилган давлат органлари фаолиятини рақамли трансформация қилиш, ҳуқуқни қўллаш амалиётига замонавий ахборот технологияларини кенг жорий этиш ҳамда амалиётга йўналтирилган кадрлар тайёрлаш бўйича устувор вазифаларнинг изчил амалий ифодасидир. Бундай ташаббуслар “рақамли прокуратура” концепциясини босқичма-босқич рўёбга чиқариш, тергов сифатини ошириш ва жиноятларга қарши курашиш самарадорлигини таъминлашга хизмат қилади.