Ҳудудларда тергов сифатини ошириш: Сурхондарёда ўқув-амалий семинар

Ўзбекистон Республикаси Президенти раислигида жорий йил 27 январь куни ўтказилган видеоселектор йиғилишида тергов сифатини тубдан ошириш ва унинг шаффофлигини таъминлаш бўйича белгиланган вазифалар ижросини таъминлаш мақсадида тизимли ишлар изчил давом эттирилмоқда.

Мазкур вазифалар доирасида Ҳуқуқни муҳофаза қилиш академияси томонидан Сурхондарё вилояти прокуратураси ҳамда вилоят ички ишлар органлари терговчилари учун тергов фаолияти сифатини оширишга қаратилган ўқув-амалий семинар ташкил этилди.

Семинар давомида ахборот технологиялари ёрдамида содир этилаётган жиноятларни тергов қилиш, жиноятларнинг рақамли изларини аниқлаш, тергов ҳаракатларини ўтказишда рақамли криминалистика имкониятларидан фойдаланиш, кибержиноятларни фош этиш ва тергов қилишнинг долзарб масалалари муҳокама қилинди.

Шунингдек, кибержиноятларга қарши курашишда банк ҳисоб рақамларини жиноий мақсадларда тақдим этиш ва улардан фойдаланишга қарши жиноят-ҳуқуқий механизмлар бўйича тушунтиришлар берилди.

Замонавий ахборот технологиялари ва глобал рақамлаштириш шароитида жиноятларни очишда очиқ манбалардан олинган маълумотлардан фойдаланиш тактикаси ва стратегиясига алоҳида эътибор қаратилди.

Ўқув-амалий семинар интерактив усуллар, мунозара ва савол-жавоблар шаклида ташкил этилди. Бу иштирокчиларнинг назарий билимларини мустаҳкамлаш ва амалий кўникмаларини оширишга хизмат қилади.

Бундай семинарлар ҳудудларда мунтазам равишда ўтказилиб, тергов сифатини оширишга қаратилган илмий ёндашув асосидаги амалий ёрдам ва малака ошириш тадбирлари тизимли равишда давом эттирилади.