Ҳуқуқни муҳофаза қилиш академияси – замонавий хавфсизлик масалалари бўйича минтақавий мулоқот майдони

Замонавий хавфсизлик масалалари долзарб аҳамият касб этаётган шароитда инқирозли ҳолатларга тайёргарлик, уларнинг оқибатларини самарали бошқариш ҳамда таҳлилий механизмларни ривожлантириш зарурати кучаймоқда. Шу нуқтаи назардан, Ҳуқуқни муҳофаза қилиш академияси замонавий хавфсизлик масалалари бўйича минтақавий профессионал мулоқот майдони сифатида навбатдаги “Инқироздан кейин: йирик кўламли террористик ҳужумдан сўнг инқирозни бошқаришни таҳлил қилиш” мавзусидаги халқаро семинарга мезбонлик қилди.

Тадбир Европа Иттифоқининг уюшган жиноятчилик ва терроризмга қарши курашишга қаратилган EU-ACT лойиҳаси билан ҳамкорликда ташкил этилди. Унинг асосий мақсади ҳуқуқни муҳофаза қилувчи органлар ходимларининг касбий салоҳиятини ошириш, замонавий хавфсизлик таҳдидларига қарши самарали механизмларни такомиллаштириш ҳамда халқаро ҳамкорликни янада мустаҳкамлашдан иборат.

Беш кунлик семинар ишида Ўзбекистон Республикаси Бош прокуратураси, Давлат хавфсизлик хизмати, Ички ишлар вазирлиги, Миллий гвардия ҳамда бошқа ваколатли идоралар вакиллари, шунингдек уларнинг Қозоғистон, Қирғизистон ва Тожикистон давлатларидан келган ҳамкасблари иштирок этди. Бундай формат хавфсизликни таъминлаш соҳасида илғор тажрибалар алмашиш, мувофиқлаштирилган ёндашувларни ишлаб чиқиш ва минтақавий ҳамкорликни мустаҳкамлашга хизмат қилади.

Мазкур семинар ўқув дастурининг учинчи босқичи ҳисобланади. Илгари “Инқироздан олдин” ва “Инқироз даврида” мавзуларида ўтказилган тадбирларнинг мантиқий давоми сифатида ушбу босқич инқироздан кейинги вазиятни барқарорлаштириш, амалга оширилган чора-тадбирларни чуқур таҳлил қилиш, хавф-хатарларни қайта баҳолаш ҳамда келгусида бундай ҳолатларнинг олдини олишга қаратилган тизимли ёндашувларни қамраб олади.

Семинарга Франциядан халқаро даражадаги экспертлар жалб этилган бўлиб, улар Европа давлатларида содир этилган террористик ҳужумлар оқибатларини бартараф этиш, аҳоли хавфсизлигини таъминлаш ва махсус операцияларни амалга ошириш жараёнларида бевосита иштирок этган тажрибали мутахассислар ҳисобланади. Уларнинг амалий тажрибаси иштирокчиларга инқирозли вазиятларда тезкор қарор қабул қилиш, идоралараро мувофиқлашувни таъминлаш ва таҳлилий механизмларни такомиллаштириш бўйича илғор ёндашувларни ўзлаштириш имконини бермоқда.

Дастур доирасида илғор методикалар, амалий кейслар, сценарий асосидаги машқлар (tabletop exercises), миллий режалар ва аудит механизмларини такомиллаштиришга қаратилган интерактив машғулотлар ташкил этилмоқда. Шунингдек, профессионал мулоқот ва тажриба алмашиш учун алоҳида учрашувлар ўтказилиши режалаштирилган.

Мазкур тадбир Академиянинг минтақада замонавий хавфсизлик чақириқларига оид таълим, таҳлил ва илмий тадқиқотларни уйғунлаштирган ихтисослашган марказ сифатидаги мавқеини янада мустаҳкамлашга хизмат қилмоқда. Академия халқаро шериклар билан ҳамкорликда институционал салоҳиятни ошириш, таҳлилий ёндашувларни амалиётга татбиқ этиш ва жамоат хавфсизлигини таъминлашга қаратилган ишларини изчил давом эттиради.