Янги лавозимга тайинланган туман прокурорларининг малака ошириш курслари

Жорий йилнинг 29 декабрь куни Бош прокуратура Академиясида янги лавозимга тайинланган туман (шаҳар) прокурорларининг “Ҳуқуқбузарликлар профилактикаси ва жиноятчиликка қарши курашиш самарадорлигини оширишда прокуратура органларининг вазифалари” мавзусидаги малака ошириш курслари якунланди.

Мазкур курслар дастури туман (шаҳар) прокурорларининг ҳуқуқбузарликлар профилактикаси ва жиноятчиликка қарши курашиш бўйича прокуратура органлари олдида турган долзарб вазифаларни атрофлича ўрганиш ва уларнинг фаолиятида мавжуд бўлган тизимли муаммо ва камчиликларни таҳлил қилиш асосида шакллантирилди.

Шу билан бирга, курслар доирасида Тошкент шаҳридаги туманларда сайёр ўқув машғулотлари ташкил этилиб, ўзаро тажриба алмашиш ҳамда ҳуқуқбузарликларнинг барвақт олдини олишни ташкил этиш борасида амалий машғулотлар ўтказилди.

Ҳар бир тингловчи томонидан республикамизнинг туманлар миқёсида ҳуқуқбузарликлар профилактикаси йўналишида олиб борилаётган ишлар ва уларнинг самарадорлиги ҳақидаги тақдимотлар тайёрланиб, Академия раҳбарияти ҳамда профессор-ўқитувчилар таркибидаги комиссия томонидан баҳоланди.   

Ўқув курслари якуни бўйича тингловчиларга малака оширганлик тўғрисида намунадаги сертификатлар топширилди.