Маҳаллаларда хавфсиз муҳит: Академия “илмий хулоса – тавсия – натижа” тамойили асосида комплекс таҳлил ишларини давом эттирмоқда

Ўзбекистон Республикаси Президентининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги ПҚ-1-сон ҳамда “2026 йилда республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги ПҚ-2-сон қарорлари ижросини таъминлаш мақсадида Академия ишчи гуруҳи томонидан маҳаллалардаги криминоген вазият комплекс тарзда ўрганилмоқда.

Ишлар “илмий хулоса – тавсия – натижа” тамойили асосида ташкил этилган бўлиб, ҳудудларга чиқиш орқали жиноятчиликка таъсир кўрсатувчи сабаб ва омиллар, жиноят содир этилишига замин яратаётган шарт-шароитлар ҳамда профилактика ишларининг ҳолати таҳлил қилинмоқда.

Жорий йил январь ойида Сурхондарё вилоятининг Шўрчи, Шеробод, Денов, Ангор, Музработ, Сариосиё, Қумқўрғон ва Қизириқ туманларида жойлашган, сўнгги уч йил давомида “қизил” тоифада сақланиб келаётган маҳаллаларда ҳуқуқбузарлик ва жиноятларни ўз вақтида аниқлаш ҳамда барвақт олдини олиш масалалари илмий ёндашувлар асосида чуқур ўрганилди.

Февраль ойида эса ПҚ-1-сон қарорининг 6-бандига мувофиқ, маҳаллаларда ҳуқуқбузарликларнинг барвақт профилактикаси ишларини комплекс ташкил этиш мақсадида Академия ходимлари Бош прокуратура ҳузурида тузилган Республика идоралараро мувофиқлаштириш штаби ва унинг доимий фаолият кўрсатувчи ишчи гуруҳи таркибида Сурхондарё вилояти бўйича бириктирилган маҳаллаларда назорат тартибида ўрганиш ўтказди.

Ўрганишлар давомида маҳалладаги криминоген вазиятга таъсир қилувчи омиллар, ижтимоий-маиший муаммолар ҳамда профилактика тадбирларининг самарадорлигига алоҳида эътибор қаратилди. Шунингдек, “маҳалла еттилиги” аъзолари билан кенг кўламли маълумот алмашинуви ташкил этилди.

Хусусан, еттиликнинг вазифаларига оид саволлардан иборат электрон тест дастури – Quiz bot ишлаб чиқилди ва барча маҳаллаларга жорий этилди. Ушбу ресурс норматив-ҳуқуқий ҳужжатлар мазмунини тезкор ва қулай тарзда етказиш, шунингдек, касбий билим ва кўникмаларни мустаҳкамлашга хизмат қилади.

Ўрганиш натижалари, таклиф ва тавсиялар умумлаштирилиб, криминоген вазиятни яхшилашга қаратилган келгусидаги йўл хариталарига киритиш учун масъулларга тақдим этилди.

Академия томонидан маҳаллаларда хавфсиз муҳитни яратиш ва ҳуқуқбузарликларнинг олдини олиш тизими самарадорлигини оширишга қаратилган ишлар изчил давом эттирилмоқда.