Китобхонлик маданиятини ривожлантириш – устувор йўналиш: Академияда китоб ярмаркаси ташкил этилди

Ҳуқуқни муҳофаза қилиш академиясида Ўзбекистон Республикаси Президентининг 2026 йил 15 январдаги “Китобхонлик маданиятини ривожлантириш ва аҳоли ўртасида китоб ўқишга қизиқишни ошириш чора-тадбирлари тўғрисида”ги ПҚ-9-сон қарори ижросини таъминлаш юзасидан тизимли ишлар амалга оширилмоқда. Мазкур фаолият доирасида Академияда интеллектуал муҳитни мустаҳкамлаш, илмий-таълим жараёнини қўллаб-қувватлаш ҳамда барқарор китобхонлик маданиятини ривожлантиришга қаратилган тематик китоб ярмаркаси ташкил этилди.

Тадбир профессор-ўқитувчилар ва таълим олувчилар ўртасида китобхонлик маданиятини юксалтириш, уларнинг илмий ва маърифий дунёқарашини кенгайтиришга қаратилди.

Ярмарка давомида ҳуқуқ, жиноят ҳуқуқи, криминология, суд-ҳуқуқ тизими, психология ҳамда бошқа йўналишларга оид замонавий ўқув қўлланмалари, илмий-амалий адабиётлар ва янги нашрлар тақдим этилди. Иштирокчилар ўқув ва илмий-тадқиқот фаолияти учун долзарб манбалар билан яқиндан танишиш, шунингдек шахсий ва ўқув кутубхоналарини бойитиш имкониятига эга бўлдилар.

Бундай тадбирлар таълим сифати ошишига, илмий ташаббусларни рағбатлантиришга ва ёшлар ўртасида барқарор мутолаа маданиятини шакллантиришга хизмат қилади.