Академияда ҳуқуқни муҳофаза қилиш органлари ходимларининг психологик тайёргарлиги масалалари муҳокама қилинди

Ҳуқуқни муҳофаза қилиш академиясида Касбий психология ва бошқарув фаолияти кафедраси ташаббуси билан “Республика маҳаллаларида хавфсиз муҳитни яратиш ва жиноятчиликнинг барвақт профилактикаси самарадорлигини оширишда ҳуқуқни муҳофаза қилиш органлари ходимларининг психологик тайёргарлиги” мавзусида давра суҳбати ўтказилди.

Тадбирда Давлат хавфсизлик хизмати академияси, Ички ишлар академияси, Жамоат хавфсизлиги университети, Божхона институти ҳамда Ички ишлар органлари марказий аппарати вакиллари иштирок этдилар.

Давра суҳбати давомида ҳуқуқни муҳофаза қилиш соҳасида замонавий кадрларни тайёрлашда нокасбий кўникмалар (soft skills)ни баҳолаш ва ривожлантиришнинг илғор усуллари, “Юридик психология” илмий-амалий журналини таъсис этиш билан боғлиқ ташкилий масалалар, шунингдек раҳбар кадрлар компетенцияларини баҳолаш ва Ассессмент маркази технологиясини амалиётга жорий этиш масалалари муҳокама қилинди.

Муҳокамалар давомида касбий компетенцияларни илмий асосда баҳолаш, психологик диагностика воситаларини қўллаш ва ташкилотлараро ҳамкорликни кучайтиришнинг аҳамияти алоҳида таъкидланди.

Тадбир якунида муассасалар ўртасида ўзаро ҳамкорликни кенгайтириш ва психологик тайёргарликни такомиллаштириш бўйича қўшма ташаббусларни амалга ошириш юзасидан келишувга эришилди.