Академияда “Заковат” – билим ва тафаккур беллашган интеллектуал муҳит

Ҳуқуқни муҳофаза қилиш академиясида талабаларнинг интеллектуал салоҳиятини ривожлантириш, мантиқий тафаккурини чуқурлаштириш ҳамда жамоавий ҳамкорлик маданиятини мустаҳкамлашга хизмат қиладиган “Заковат” интеллектуал ўйини анъанавий тарзда ўтказиб келинмоқда.

Навбатдаги беллашувда ҳуқуқни муҳофаза қилувчи органларнинг ллий таълим муассасалари жамоалари иштирок этиб, билим, тезкор фикрлаш ва жамоавий ҳамжиҳатлик борасида ўзаро беллашдилар. Тадбирда “Заковат” интеллектуал клуби вакили Р.Бурхонов махсус меҳмон сифатида қатнашиб, иштирокчилар билан мулоқот қилди ҳамда интеллектуал ўйинларнинг ёшлар тафаккурини ривожлантиришдаги аҳамияти ҳақида фикр билдирди.

Интеллектуал беллашувда тўққизта жамоа фаол иштирок этиб, ўз билим даражаси, таҳлилий ва мантиқий фикрлаш қобилияти, шунингдек жамоавий ишлаш кўникмаларини намоён этди. Беллашув қизғин баҳс-мунозаралар, соғлом рақобат муҳити ва билимга чанқоқлик руҳида ўтиб, иштирокчиларнинг интеллектуал салоҳиятини янада намоён қилди.

Якунларга кўра биринчи ўринни Божхона институти, иккинчи ўринни Ҳарбий алоқа институти, учинчи ўринни Ички ишлар вазирлиги академияси жамоалари эгаллади.

Ғолиблар Академия раҳбарияти томонидан дипломлар, эсдалик совғалари ҳамда махсус кубок билан тақдирланди.

Мазкур интеллектуал тадбирлар талабаларнинг билим савиясини юксалтириш, танқидий ва мантиқий фикрлаш маданиятини шакллантириш, жамоада самарали ишлаш кўникмаларини ривожлантириш ҳамда ёшларда фаол фуқаролик позициясини мустаҳкамлашга хизмат қилади.