Академияда ISO 37001 стандарти асосида коррупцияга қарши тизим жорий этилмоқда

Ҳуқуқни муҳофаза қилиш академиясида таркибий тармоқлар раҳбарлари ҳамда масъул ходимлар учун “CERT Academy” ташкилоти эксперти иштирокида ISO 37001:2025 “Коррупцияга қарши курашиш менежмент тизими” халқаро стандарти бўйича махсус тренинг ўтказилди.

Мазкур тадбир Академия фаолиятида коррупциявий хавф-хатарларни тизимли равишда аниқлаш, баҳолаш ва бартараф этиш механизмларини халқаро талаблар асосида такомиллаштириш, шаффофлик ва ҳисобдорликни кучайтириш, шунингдек институционал даражада коррупциянинг олдини олишга қаратилган самарали ички назорат тизимини шакллантириш мақсадида ташкил этилди.

Тренинг давомида иштирокчилар ISO 37001:2025 стандартининг асосий принциплари, коррупцияга қарши сиёсатни ишлаб чиқиш ва жорий этиш тартиби, коррупциявий хавфларни баҳолаш методологияси, “due diligence” (ишончли текширув) механизмлари, манфаатлар тўқнашувини бошқариш, ички назорат ва мониторинг жараёнларини ташкил этиш, шунингдек ҳужжатлаштириш ва ҳисобот бериш талаблари бўйича амалий билим ва кўникмаларни мустаҳкамладилар.

Тренинг якунлари бўйича Академиянинг 20 нафар ходими ISO 37001 халқаро стандарти асосида “ички аудитор” мақомини қўлга киритди. Ушбу мақом уларга коррупцияга қарши менежмент тизимининг самарадорлигини мустақил баҳолаш, ички аудит тадбирларини ўтказиш, аниқланган камчиликларни бартараф этиш ҳамда тегишли таклифлар ишлаб чиқиш имкониятини беради.

Мазкур ташаббус Академияда коррупцияга қарши комплаенс маданиятини шакллантириш, бошқарув сифатини ошириш ва институционал барқарорликни таъминлашга хизмат қилади. Шу билан бирга, у давлат органларида коррупцияга қарши самарали тизимларни жорий этиш бўйича илғор амалиётни шакллантиришга замин яратади.