Рақамли криминалистика амалиётда: прокуратура терговчилари учун инновацион жамланма тақдим этилди

Ўзбекистон Республикаси Президенти раислигида жорий йилнинг 27 январь куни ўтказилган видеоселектор йиғилишида тергов сифатини тубдан ошириш ва унинг шаффофлигини таъминлаш бўйича берилган топшириқлар ижроси доирасида Ўзбекистон Республикаси Ҳуқуқни муҳофаза қилиш академияси рақамли далилларни процессуал тартибда йиғиш, мустаҳкамлаш ва расмийлаштириш методологиясини такомиллаштиришга қаратилган кенг кўламли амалий чора-тадбирларни изчил амалга оширмоқда.

Мазкур ишлар натижаси сифатида Академиянинг Рақамли криминалистика илмий-тадқиқот институти томонидан ишлаб чиқилган махсус жамланма Ўзбекистон Республикаси Бош прокурорига тақдим этилди. Жамланма таркибига киритилган замонавий рақамли криминалистика техник воситалари намойиш этилди ҳамда уларнинг суриштирувчилар, терговчилар ва прокурорлар томонидан жиноят ишлари бўйича иш юритиш жараёнида рақамли далилларни тезкор ва ишончли аниқлаш, қайд этиш ҳамда процессуал жиҳатдан расмийлаштиришдаги амалий аҳамияти кўрсатиб берилди.

Шунингдек, Академиянинг Рақамли криминалистика илмий-тадқиқот институти ходимлари томонидан Тошкент шаҳри Олмазор тумани прокуратураси терговчилари билан ўқув машғулотлари ўтказилди. Машғулотлар давомида терговчилар махсус жамланма таркибидаги техник воситалардан фойдаланиш тартиби ва усулларини ўзлаштирдилар, шунингдек Ўзбекистон Республикасининг Жиноят-процессуал кодекси талабларига тўлиқ мувофиқ ҳолда рақамли далилларни йиғиш, ҳужжатлаштириш ва процессуал жиҳатдан расмийлаштириш бўйича амалий кўникмаларини мустаҳкамладилар.

Амалга оширилаётган мазкур тадбирлар тергов органлари ходимларини рақамли криминалистика соҳасидаги илғор технологиялар билан таъминлашга, уларнинг касбий компетенцияларини янги босқичга олиб чиқишга ҳамда жиноят ишлари бўйича ишончли исбот базасини шакллантириш орқали тергов жараёнида қонунийлик ва объективлик принципларига қатъий риоя этилишини таъминлашга хизмат қилади.