Янги йилингиз муборак!

Азиз ва муҳтарам дўстлар, ҳамкасблар!

Мана шу файзли дамларда барчангизни янги – 2019 йил билан самимий муборакбод этиб, Сизларга тинчлик, омонлик, сиҳат-саломатлик, хонадонингизга қут-барака тилаймиз.

Бугун биз вақтнинг шиддат билан ўтишига яна бир бор гувоҳ бўлиб, янги йилга, ҳаётимизнинг янги бир довонига қадам қўймоқдамиз.

Ўтиб бораётган йил прокуратура органлари, шу жумладан Академия олдига фидокорона ва машаққатли меҳнатни талаб қиладиган вазифаларни қўйиш билан бир қаторда, омадли ва самарали йил бўлди десак, муболаға бўлмайди.

Прокуратура органлари кадрларини тайёрлаш, қайта тайёрлаш ва уларнинг малакасини оширишнинг замонавий тизими яратилиб, тараққиётимизнинг янги даври, янги босқичига қадам қўйдик.

Бу борада, 2018 йил 8 майда Ўзбекистон Республикаси Президентининг “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги Фармони қабул қилинганлиги беқиёс аҳамиятга эга бўлиб, Академияда магистратурада таҳсил олиш, бирламчи ихтисослашув шаклида касбий қайта тайёрлаш, илмий даража берувчи ихтисослашган кенгаш ва бошқа бир қатор институционал ўзгаришларнинг ҳуқуқий асослари белгилаб берилди.

Фармон қабул қилинганлигидан буён қисқа вақт ўтган бўлишига қарамасдан, Академия фаолиятининг асосий йўналишлари илғор технологиялар асосида рақамлаштирилиб, модернизация қилинди, барча жабҳаларда ишларни ташкил этишда эскича ёндашувдан воз кечилиб, ўқитишнинг замонавий шакл ва усулларини жорий этиш, таълим даражасини сифат жиҳатидан ошириш ва тубдан такомиллаштириш, илмий тадқиқотларнинг амалий аҳамияти ва самарадорлигини янада ошириш чоралари кўрилди, шунингдек, моддий-техник база мустаҳкамланди.

Илмий салоҳият бир неча баравар ошишига эришилди, хориждаги етакчи илмий тадқиқот муассасалари ва ташкилотлар билан ҳамкорлик йўлга қўйилди.

Шу каби Академия фаолиятининг бошқа йўналишларида ҳам бир қатор ишлар амалга оширилди.

Ниҳоясига етиб бораётган йил Академия фаолиятининг барча жабҳаларида 2019 йилда ҳам янгидан-янги вазифаларни қўймоқда.

Мана шу қувончли дамларда барчангизга Янги йил қутлуғ ва баракали, ҳар бир оилага хотиржамлик, бахт ва омад ҳамда фаровонлик, халққа хизмат қилишдек шарафли ишларингизга ривож олиб келишини тилаб қоламиз!